Փարիզը թույլ է տվել պատժամիջոցների կիրառման հնարավորությունը Թուրքիայի դեմ

Ֆրանսիայի արտաքին գործերի նախարար Ժան-Իվ Լե Դրիանը դատապարտել է Թուրքիայի նախագահ Ռեջեփ Թայիփ Էրդողանի կոշտ հայտարարությունները Ֆրանսիայի և դրա ղեկավարության դեմ` թույլ տալով պատժամիջոցների հնարավորությունը, հաղորդում է «Ինտերֆաքս»-ը:

«Նախագահ Էրդողանն այժմ պարբերաբար հանդես է գալիս բռնության, նույնիսկ ատելության անընդունելի հայտարարություններով»,- ասել է Ֆրանսիայի արտգործնախարարը Europe 1 ռադիոկայանին տված հարցազրույցում:

«Սա ուղղված ոչ միայն Ֆրանսիայի դեմ, այդ հարցում կա լիակատար եվրոպական սոլիդարություն, և մենք պնդում ենք, որպեսզի Թուրքիան հրաժարվի այդ տրամաբանությունից»,- շարունակել է Լե Դրիանը:

Ընդ որում, նախարարը հիշեցրել է, որ «Եվրոպական խորհուրդը, որը միավորում է Եվրամիության 27 անդամ պետություններին և կառավարությունների ղեկավարներին, որոշում է կայացրել, որ անհրաժեշտ միջոցներ է ձեռնարկելու թուրքական իշխանությունների դեմ»: Ըստ նրա` եթե թուրքական կողմը չփոխի իր դիրքորոշումը, «կան ճնշման միջոցներ, կա հնարավոր պատժամիջոցների ծրագիր»:

Հիշեցնենք, որ Էրդողանը մեղադրել է Ֆրանսիայի նախագահ Էմանուել Մակրոնին, ով պաշտպանում էր ծաղրանկարներ անելու իրավունքը, այդ թվում` Մուհամեդ մարգարեի, իսլամի դեմ ատելության արշավում և կասկածի տակ է դրել Ֆրանսիայի պետության ղեկավարի հոգեկան առողջությունը: Բացի այդ, չորեքշաբթի` նոյեմբերի 4-ին, Թուրքիան սպառնացել է «ամուր կերպով պատասխանել» Ֆրանսիայում թուրքական «Գորշ գայլեր» ծայրահեղ ազգայնական կազմակերպության արգելքին:

Ֆրանսիայի ՆԳ նախարար Ժերալդ Դարմանենը նախօրեին պաշտոնապես հայտարարել էր «Գորշ գայլերի»` երկրի տարածքում արգելքի մասին: ««Գորշ գայլեր» շարժումը լուծարվել է նախարարների խորհրդում` հանրապետության հախագահի հանձնարարականների համաձայն»,- գրել էր ՆԳ նախարարը Twitter-ում, տեղեկացնում է News.am-ը: