Հայաստանում էլեկտրամոբիլների սեփականատերերը հնարավորություն կստանան զգալիորեն խնայել հարկային վճարումների հարցում։ Կառավարությունը հաստատել է գույքահարկի հաշվարկման նոր մեխանիզմ, որը կվերացնի շարժիչի հզորության հետ կապված անորոշությունն ու կթեթևացնի վարորդների ֆինանսական բեռը։
Մարտի 5-ի նիստում գործադիր մարմինը հավանություն է տվել Ներքին գործերի նախարարության նախագծին, որով վերանայվում է էլեկտրական շարժիչով տրանսպորտային միջոցների հարկման կարգը։ Մինչ այժմ էլեկտրամոբիլի շարժիչի ճշգրիտ հզորության որոշումը լուրջ բարդություններ էր առաջացնում։ Հաճախ ներմուծվող մեքենաների վրա բացակայում էր նույնականացման պիտակը, կամ դրա վրա նշված էին լինում հակասական տվյալներ՝ առավելագույն և նվազագույն արժեքներով։ Նման անորոշությունը բացասաբար էր անդրադառնում քաղաքացիների վրա՝ ստիպելով նրանց գերավճարել գույքահարկի տարեկան մարման ժամանակ։
Նոր կանոնակարգի համաձայն՝ էլեկտրաշարժիչի հզորության ցուցանիշներն այսուհետ կվերցվեն տրանսպորտային միջոցների էլեկտրոնային անձնագրերի միասնական շտեմարանից։ Անհրաժեշտ տեղեկատվության բացակայության դեպքում նախատեսվում է կիրառել հատուկ մշակված հաշվարկային բանաձև։
Ներքին գործերի նախարար Արփինե Սարգսյանը կոնկրետ օրինակներով հստակ ներկայացրել է նոր համակարգի առավելությունները։ Մասնավորապես, 2025 թվականի արտադրության և 544 ձիաուժ հզորությամբ էլեկտրամոբիլի համար նախկինում գանձվող 660 000 դրամի փոխարեն նոր կարգավորմամբ քաղաքացին կվճարի ընդամենը 276 000 դրամ։ Ավելի փոքր հզորությամբ մեքենաների դեպքում օգուտն առավել քան ակնհայտ է. մինչև 218 ձիաուժ հզորությամբ 2025 թվականի մեքենայի գույքահարկը գործող 134 000 դրամից կնվազի մինչև 43 500 դրամ։
Verelq.am
