Արցախում վիրավորված զինծառայողն տեղափոխվում է Երևան

ՊԲ արևելյան ուղղությամբ տեղակայված զորամասերից մեկի պահպանության տեղամասում, երեկ՝ ապրիլի 5-ին, 17։30-ի սահմաններում, հակառակորդի կողմից արձակված կրակոցից, հրազենային վիրավորում է ստացած ՊԲ զինծառայող, 2000թ. ծնված Արայիկ Ռոբերտի Շախպազյանն այս պահին տեղափոխվում է Երևան։ Այս մասին News.am-ին հայտնեց ՊՆ խոսնակ Շուշան Ստեփանյանը։

«Այս պահին տեղափոխվում է Երևան, ճանապարհին են։ Զինծառայողի վիճակը գնահատվում է կայուն ծանրության»,- ասաց Ստեփանյանը։

News.am-ի տեղեկություններով՝ ՊԲ զինծառայողը Լոռու մարզի Վանաձոր քաղաքից է։

News.am-ը զրուցեց նաև Վանաձորի քաղաքապետ Մամիկոն Ասլանյանի հետ, որի փոխանցմամբ՝ զինծառայողի հայրն այս պահին Հայաստանում չէ.

«Նորմալ ընտանիքից են, հորն անձամբ եմ ճանաչում։ Կյանքին վտանգ չի սպառնում, առաջին օգնությունը ցույց տվել են Ստեփանակերտում»։

Նշենք, որ դեպքի մանրամասները պարզելու համար կատարվում է քննություն: