ԼՀԿ-ն առաջարկներ է ներկայացրել

ԼՀԿ-ն մի քանի առաջարկ է ներկայացրել վարչապետին և ԱԺ նախագահին։

«ԼՀ խմբակցությունը դիմել է ՀՀ վարաչապետին և ԱԺ նախագահությանը, որ հայտնի շատ քննադատված 30% ֆոնդերը, որոնք նախատեսված են պարգևավճարների համար, դրանք հանվեն բարձաստիճան պաշտոնատար անձանց համար և այս ամբողջ ֆոնդերը՝ խոսքը միլիոնավոր դրամների մասին է, ուղղվեն կառավարության կողմից ձևավորված և ձևավորվելիք սոցիալական փաթեթներին, որ տանը նստած մեր քաղացիները, ոորնք չեն աշխատում, կամ օրավարձով են աշխատել, կամ Ռուսաստանում են աշխատել ու հիմա չեն կարող մեկնել, այդ գումարներից օգտվեն», - ֆեյսբուքյան ուղիղ եթերում ասաց ԼՀ խմբակցության ղեկավար Էդմոն Մարուքյանը։

Նա ընդգծեց, որ կառավարությանն առաջարկվել է բյուջետային մեծ ծախսեր իրականացնել, որպեսզի տնտեսությունը կարողանա շնչել:

«Ըստ էության շատ ծանր իրավիճակում ենք գտնվում, և դեռ տասը օր խիստ կարանտինը պետք է պահպանենք», - ասաց նա։

Մարուքյանն անդրադարձավ նաև խորհրդարանում ընդունված անձնական տվյալների պաշտպանության, հաղորդակցության ազատության և գաղտնիության իրավունքներին միջամտելու նախագծին։

«Քաղաքացիներին տեղորոշելու նախագիծը որևէ ազդեցություն չի ունենալու համավարակի դեմ պայքարի առումով», - ասաց Մարուքյանը։

Նա ընդգծեց, որ նախագծի ընդունումը հետընթաց է ժողովրդավարական իմաստով և որևէ կապ չունի մարդկանց կյանքերը փրկելու կամ պաշտպանելու առումով, տեղեկացնում է Aysor.am։