Հրանտ ՄԵԼԻՔ-ՇԱՀՆԱԶԱՐՅԱՆ․ ՆԻԿՈԼՆ ՊԱՅՔԱՐՈՒՄ Է ՀԱՅԱՍՏԱՆԻ ՈՒ ՀԱՅ ԺՈՂՈՎՐԴԻ ՎԵՐՋՆԱԿԱՆ ՊԱՐՏՈՒԹՅԱՆ ՀԱՄԱՐ
«Եթե իմ ժողովուրդը պետք է որոշի, որ ինձ գնդակահարելու է, ես խոնարհ կանգնելու եմ այդ գնդակահարության պատի տակ»: Ահա այսպես է Նիկոլը հիմա շփվում ժողովրդի հետ։ Նա չոքեչոք գյուղից գյուղ է գնում ու փորձում ամրագրել անցած պատերազմում Ադրբեջանի հաղթանակը։ Այս մասին ֆեյսբուքյան իր էջում գրել է հասարակական-քաղաքական գործիչ Հրանտ Մելիք-Շահնազարյանը:
«Իրականում ամեն ինչ շատ պարզ է։ Նիկոլն ընտրությունների է պատրաստվում։ Ընտրություններ, որոնց հիմնական հարցը վերաբերում է ոչ թե Հայաստանում նրա կամ ուրիշ մեկի իշխանություն լինելուն, այլ պատերազմի արդյունքները հանրության կողմից հաստատելուն կամ մերժելուն։ Նիկոլի հաղթանակը նշանակելու է պատերազմի արդյունքների լեգիտիմացում։ Ահա այսպիսի յուրօրինակ հանրաքվե, կարծում եմ՝ նախապես հայտնի արդյունքներով։
Ուրեմն ի՞նչ է անում Նիկոլը, երբ, համբուրելով զոհվածների հարազատների ձեռքերն ու ոտքերը, համոզում է կրկին իր օգտին քվեարկել։ Ճիշտ է՝ ամրագրում է Հայաստանի կապիտուլյացիան։ Այսինքն, երկաթբետոնե հիմքեր է ստեղծում Հայաստանում և ընդհանրապես մեր տարածաշրջանում թշնամու դոմինանտ դերակատարության համար։
Սա շատ պարզ իրողություն է, որը հնարավոր չէ չհասկանալ։ Մարդիկ պետք է իմանան, որ պայքարելով հանուն իր հաղթանակի՝ Նիկոլն իրականում պայքարում է Հայաստանի ու հայ ժողովրդի վերջնական պարտության համար։ Եվ քանի որ սա չափազանց ակնհայտ իրողություն է, ես վստահ կարող եմ պնդել, որ Նիկոլը դա գիտակցված է անում։ Դա է իր ծրագիրը՝ նա պետք է ամրագրի մեր պարտությունը»,- գրել է Մելիք-Շահնազարյանը:
