ՏՐԴԱՏԸ՝ ՄԱՆԴԱՏՈՎ
Եթե Փաշինյանն իր ընկերոջը՝ նախկին մարզպետ Տրդատ Սարգսյանին ընդգրկեց «Քաղաքացիական պայմանագիր» կուսակցության նախընտրական ցուցակում և անցկացրեց խորհրդարան, ուրեմն համարում է, որ արդարադատությունն այլևս պարտք ու պահանջ չունի Սարգսյանից։ Հիշեցնեմ, որ Տրդատը հրաժարական տվեց այն բանից հետո, երբ ծեծի ենթարկված փոխգնդապետ Արա Մխիթարյանի ընկերները հեռուստախցիկների առջև խոստացան ներկայացնել փոխգնդապետի ծեծին նրա մասնակցության անհերքելի ապացույցներ։ Դեպքը տեղի է ունեցել Եղեգնաձորում 2019թ. սեպտեմբերի 17-ին:
Մենք պարբերաբար տեղեկացրել ենք մեր ընթերցողներին հետաքննության ընթացքի մասին՝ մատնանշելով մի շարք անհամապատասխանություններ։ Օրինակ, բազմաթիվ հարցեր են մնացել հսկող տեսախցիկներից ոստիկանության ստացած նյութերի առնչությամբ։ Հանգամանքների տարօրինակ բերումով առգրավված տեսախցիկները չեն արձանագրել Սարգսյանին հանցագործության վայրում։ Մինչև հիմա կան բազմաթիվ վկաներ, որոնք պատրաստ են հաստատել, որ մարզպետը ներկա է եղել դեպքի վայրում և եթե նույնիսկ անձամբ չի ծեծել Մխիթարյանին, ապա չի կանխել, թեև կարող էր դա անել:
Շատերն առ այսօր վստահ են, որ մարզպետի օգնական Հարություն Գրիգորյանին առաջադրված մեղադրանքների նպատակը Սարգսյանի կաշին փրկելն է։ Կան վկաների ցուցմունքներ, որ հենց Գրիգորյանն է փոխգնդապետին հասցրել այն հարվածը, որը նրան գցել է կոմայի մեջ։ Այսօր մարզպետի օգնականը միակ մեղադրյալն է այդ գործով, թեև խոսքը խմբովի ծեծի մասին է։ Գրիգորյանի փաստաբանները փորձում են գրավի դիմաց ազատել նրան կալանքից, իսկ բուն գործը՝ արգելակել։ 2019-ին փոխգնդապետի ծեծը մեծ աղմուկ հարուցեց, հասարակությունը վրդովված էր, Տրդատը ստիպված էր հրաժարական տալ։ Այսօր կրքերը հանդարտվել են, ուստի մարզպետն անցավ խորհրդարան և արդեն լիովին անվտանգ է զգում իրեն։
Բժիշկները հրաշք են գործել
Ի սկզբանե ակնհայտ էր, որ Նիկոլի ընկերը դժվար թե դատապարտվի և արժանի պատիժ կրի։ Այսօր նա արդեն մեծամասնության խմբակցության պատգամավոր է։
Ցանկալի կլինի, որ ընդդիմադիր խմբակցությունների պատգամավորները 8-րդ գումարման խորհրդարանի ամբիոնից ժամանակ առ ժամանակ հիշեցնեն Տրդատին Արցախում ռազմական գործողությունների մասնակից փոխգնդապետի մասին…
Մխիթարյանը ողջ է, բժիշկները հրաշք են գործել՝ դուրս բերելով նրան կոմայից և ապահովելով ինքնուրույն շնչելու հնարավորությունը։ Մնացյալ առումներով ոչինչ չի փոխվել, փոխգնդապետը դեռ չի հարմարվել շրջակա միջավայրին, գիտակցությունը չի վերադարձել, սնունդը նա ստանում է հատուկ զոնդով: Մխիթարյանը գամված է անկողնուն, նա տանն է՝ մոր և հոր մշտական հսկողության ներքո։ Փոխգնդապետի ծնողները չեն հեռանում որդու մահճակալից և շարունակում են հավատալ հրաշքի:
Իսկ նախկին մարզպետը՝ ծեծի մասնակցի խարանը ճակատին, շրջում է ազատության մեջ, և շատ շուտով մենք կտեսնենք նրան խորհրդարանի ամբիոնում կամ գործադիր իշխանության համակարգում։ Նիկոլը չի լքումն յուրայիններին, իսկ մե՞նք։ Հիշեցնեմ, որ փոխգնդապետի դաժան ծեծը Արցախի պաշտպանների նկատմամբ իշխանությունների կողմից սերմանվող ատելության մթնոլորտի հետևանքն էր։
