Իրանը գյուղատնտեսական արտադրանքը կարտահանի Ռուսաստան՝ շրջանցելով Ադրբեջանը
Իրանական ընկերությունները փոխում են իրենց երթուղիները՝ Ադրբեջանի տարածքով ցամաքային ուղիների փոխարեն ապրանքները Ռուսաստան արտահանելու համար ընտրելով Կասպից ծովով ջրային տրանսպորտը։ Այս մասին հայտարարել է ԻԻՀ գյուղատնտեսական միության ղեկավար Սեյեդ Ռեզա Նուրանին, փոխանցում է Fars գործակալությունը։
Նուրանին հավելել է, որ այս որոշման պատճառը ադրբեջանական մաքսատան դանդաղ աշխատանքն է։ Նրա խոսքով, արտահանվող մրգերի ու բանջարեղենի համար Կասպից ծովով անցնող ճանապարհը շատ ավելի էժան է և արագ։
Ռուսաստան մրգերի և բանջարեղենի արտահանման համար ներգրավված են «Ամիրաբադ», «Անզալի» և «Աստարա» նավահանգիստները։
Իրանն առաջին անգամ չէ, որ հայտարարում է Ադրբեջանի տարածքով Ռուսաստան գյուղմթերքներ ուղարկելու հետ կապված նման խնդիրների մասին։
Հոկտեմբերի 18-ին իրանա-ռուսական համատեղ առևտրի պալատի տնօրենների խորհրդի անդամ Սեյեդ Ջալիլ Ջալալիֆարը հայտարարել էր, որ ադրբեջանական կողմը, Բաքվի և Թեհրանի հարաբերություններում լարվածության աճի ֆոնին, խոչընդոտում է Իրանից ապրանքների արտահանմանը Ռուսաստան։
Ի պատասխան՝ Ադրբեջանի պետական մաքսային կոմիտեն հայտարարել է, որ նման հաղորդումներն անհիմն են և չեն համապատասխանում իրականությանը։ Հայտարարության մեջ նշվում է, որ սահմանին բեռնատարների կուտակումը պայմանավորված է հենց Իրանում ծագած խնդիրներով, տեղեկացնում է News.am-ը։