ԵՄ-ն հաստատել է Ռուսաստանի դեմ պատժամիջոցների չորրորդ փաթեթը

Եվրամիությունը հաստատել է Ռուսաստանի դեմ պատժամիջոցների չորրորդ փաթեթը, որը ներառում է ևս 160 ռուսաստանցիների, այդ թվում են գործարարներ, քաղաքական գործիչներ, ինչպես նաև երեք բելառուսական բանկեր, հայտարարել է Եվրահանձնաժողովի նախագահ Ուրսուլա ֆոն դեր Լյայենը։

«Մենք էլ ավելի ենք խստացնում պատժամիջոցների ցանցը՝ ի պատասխան Ուկրաինայի դեմ Ռուսաստանի ռազմական ագրեսիայի»,- գրել է ֆոն դեր Լյայենը Twitter-ում։

«Ցուցակում 160 մարդ կա՝ օլիգարխներ, ՌԴ Դաշնային խորհրդի անդամներ։

Բելառուսի բանկային հատվածը

Ծովային նավիգացիոն սարքավորումների արտահանումը Ռուսաստան

Կրիպտոակտիվներ»,- նշել է նա:

Եվրամիության Եվրոպական խորհրդում Ֆրանսիայի նախագահությունը նույնպես Twitter-ում հայտարարել է, որ ԵՄ դեսպանները հաստատել են «նոր պատժամիջոցները, որոնք ուղղված են Ուկրաինայի դեմ ռուսական ագրեսիայի մեջ ներգրավված առաջնորդների և ռուս օլիգարխների և նրանց ընտանիքների դեմ»:

«Մասնավորապես, հաստատված հասցեական միջոցառումները բելառուսական երեք բանկերի անջատում են SWIFT համակարգից։ Դրանք պարզություն են մտցնում կրիպտոարժույթների հարցում և ցուցակում ներառում են այն ապրանքներն ու նյութերը, որոնք չի կարելի արտահանել»,- շարունակել է Ֆրանսիայի նախագահությունը:

Առավել մանրամասն տեղեկատվությունը կհրապարակվի Եվրոպական միության պաշտոնական ամսագրում, տեղեկացնում է News.am: