Հայոց ցեղասպանության մասին կրթական օրինագիծը ներկայացվել է ԱՄՆ Ներկայացուցիչների պալատ

Հայոց ցեղասպանության մասին կրթական օրինագիծը ներկայացվել է ԱՄՆ Ներկայացուցիչների պալատ։ Ամերիկայի Հայ դատի հանձնախմբը հայտնում է, որ երկու կուսակցություններից ավելի քան 45 կոնգրեսականներ են աջակցել Հայոց ցեղասպանության կրթական ակտին (Armenian Genocide Education Act):

Օրինագիծը 10 մլն դոլարի ֆինանսավորում է նախատեսում Հայոց ցեղասպանության պատմության, դասերի եւ հետեւանքների վերաբերյալ Կոնգրեսի գրադարանի կրթական ծրագրերի համար։

«Ինչպես ասում են, եթե պատմությունից դասեր չքաղենք, մենք դատապարտված ենք դրա կրկնվելուն»,- ասել է կոնգրեսական Քերոլին Մելոնին։ «Ահա թե ինչու եմ ես հպարտ, որ ներկայացնում եմ Հայոց ցեղասպանության հարցերով կրթության մասին օրենքը, որպեսզի ճշգրիտ եւ արդյունավետ ներկայացվեն Հայոց ցեղասպանության սարսափներն ու դասերը:

Կոնգրեսի երկու պալատներն էլ ճնշող մեծամասնությամբ քվեարկեցին Հայոց ցեղասպանությունը պաշտոնապես ճանաչելու օգտին, իսկ անցյալ տարի նախագահ Ջո Բայդենը հստակ հասկացրեց, որ Միացյալ Նահանգների պաշտոնական դիրքորոշումն այն է, որ այդ համակարգված սպանությունները ցեղասպանություն են եղել: Շատ կարեւոր է, որ մենք այժմ ապահովենք, որ ամերիկացիները հասանելիություն ունենան ռեսուրսներին, որոնք անհրաժեշտ են այդ վայրագության մասին իմանալու եւ բարձրաձայնելու համար»,- ասել է նա:

«Մարդկային ցեղի ամենամռայլ պահերը եկան այն ժամանակ, երբ նրանք, ովքեր լավագույնս տեղյակ էին, լուռ կանգնած էին՝ արդարացնելով իրենց պասիվությունը եւ թույլ տալով, որ տիրեն անարդարությունն ու հետապնդումները: Մենք պետք է ընդունենք անցյալի վայրագությունները, որպեսզի հույս ունենանք կանխել դրանք ապագայում: Այս նպատակին հասնելու լավագույն միջոցներից մեկը կրթությունն ու իրազեկման բարձրացումն է, այդ իսկ պատճառով ես հպարտ եմ, որ Քերոլին Մելոնիի հետ համատեղ ներկայացնում եմ Հայոց ցեղասպանության հարցերով կրթական օրենքը»,- ասել է կոնգրեսական Գաս Բիլիրակիսը:

Այս կարեւոր օրենքը, որն ընդունվել է Հայոց ցեղասպանության միջազգային օրվան՝ ապրիլի 24-ին ընդառաջ, նպատակ ունի հինգ տարվա ընթացքում 10 մլն դոլար հատկացնել Կոնգրեսի գրադարանին՝ 1915-1923թթ. Օսմանյան Թուրքիայում համակարգված եւ կանխամտածված զանգվածային սպանությունների եւ միլիոնավոր հայերի, հույների, ասորիների, քաղդեացիների, սիրիացիների, արամեացիների, մարոնիների եւ այլ քրիստոնյաների արտաքսումների մասին ամերիկացիներին իրազեկելու համար։

News.am