Հայաստանը կես տարուց կզգա Ուկրաինայի հակամարտության իրական տնտեսական հետեւանքները. Սուրեն Պարսյան
Հայաստանը ռուս-ուկրաինական հակամարտության իրական տնտեսական հետեւանքները կսկսի զգալ 5-6 ամսից։ Այս մասին ապրիլի 25-ին NEWS.am-ի թղթակցի հետ զրույցում ասաց տնտեսագետ Սուրեն Պարսյանը։
Նա պարզաբանեց, որ ռուս-ուկրաինական հակամարտությունը լուրջ ցնցումներ է առաջացրել համաշխարհային շուկաներում՝ նշելով, որ Հայաստանն արդեն որոշ չափով զգում է դրա հետեւանքները եւ կշարունակի զգալ առաջիկա մի քանի տարվա ընթացքում, քանի որ տնտեսական ակտիվության տեմպերը նվազում են, ընկել է նաեւ գյուղատնտեսության ոլորտը (ապահովում է հիմնական հոդվածն արտահանման կառուցվածքում)։ Նրա կանխատեսումներով՝ այս տարի Հայաստանի տնտեսությունը կարող է ընդհանուր անկում գրանցել։
«Իշխանությունների քաղաքականությունը չի լուծում մեր առջեւ կանգնած խնդիրները, չկա ներդրումային քաղաքականություն, չկա հակաճգնաժամային ծրագիր։ Իշխանությունն այժմ ավելի շատ շահագրգռված է քաղաքական, քան տնտեսական խնդիրների լուծմամբ։ Այս պայմաններում իշխանությունները հաճախ ուռճացված թվեր են «պատվիրում» համապատասխան գերատեսչություններին, մինչդեռ պետք է հակաճգնաժամային քաղաքականություն մշակեն եւ վերանայեն դրամավարկային քաղաքականությունը։ Կենտրոնական բանկի՝ ամեն գնով գների կայունությունը պահպանելու քաղաքականությունը քայքայում է մեր տնտեսությունը։ Մենք պետք է հասկանանք, որ մեր արժույթը, առաջին հերթին, պետք է մրցունակ լինի եւ ուղղված լինի արտահանման խթանմանը։ Կարեւոր է կասեցնել գյուղատնտեսության անկումը եւ աճ ապահովել ոչ թե բանկերին, այլ գյուղացիներին սուբսիդիաների տրամադրման միջոցով։ Կարեւոր է նաեւ օգտագործել սփյուռքի ներուժը»,- ընդգծեց Պարսյանը։
Փորձագետը վստահ է, որ առանց այս ամենի վիճակն ավելի վատ կլինի, քան 2020 թվականին, երբ համաշխարհային տնտեսության 3 տոկոս անկման ֆոնին Հայաստանում անկումը 7.4 տոկոս կազմեց:
«Հաշվի առնելով աշխարհում տիրող բացասական միտումները եւ մեզ համար սպասվող ցնցումները՝ կառավարությունը պետք է հակաճգնաժամային կառավարման ռեժիմի անցնի»,- եզրափակեց նա։
