Եվս երկու օր քայլելու ենք. մեկնարկել է Վանեցյանի աջակիցների երթը

Հայաստանի ԱԱԾ նախկին պետ Արթուր Վանեցյանի և նրա համախոհների երթը մեկնարկել է Երևանի Ազատության հրապարակից։

Երթի մասնակիցները .շարժվելու են Թումանյան - Խանջյան, Գր. Լուսավորիչ – Իտալիայի փողոց - Ազատության հրապարակ - Սախարովի հրապարակ – Նալբանդյան երթուղով։

«Ինձ հարցնում են, թե ինչքա՞ն կարող ես քայլել՝ ևս երկու օր, և հետո կանցնի պայքարի հաջորդ փուլ։ Անջատեք ձեր հեռախոսները և միացեք մեզ»,- հայտարարեց Վանեցյանը։

Հայտնել ենք, որ ՀՀԿ-ականների «Stop Նիկոլ» խորագրով երթը մեկնարկել էր Ավետիք Իսահակյանի արձանի մոտից, քայլելով Աբովյան փողոցով՝ նրանք հասել էին Կառավարության շենքի մոտ, որտեղ կարճ ժամանակով փակեցին Տիգրան Մեծի պողոտան, գունավոր ծխագլաններ վառեցին, այնուհետև շարունակեցին ճանապարհը Մելիք Ադամյան, Նալբանդյան, Թումանյան փողոցներով ու հասան Ազատության հրապարակ։

Արդեն մի քանի օր է` ընդդիմությունն ակցիաներ է անում Երևանում։ Երեկ մայրաքաղաքում առանձին ակցիաներ են իրականացրել «Հայաստան», «Պատիվ ունեմ» դաշինքները, «5165» շարժումը։

Ապրիլի 28-ի առավոտյան մի խումբ երիտասարդներ շարունակել են իրազեկման ակցիաները մայրաքաղաքի բուհերում։ Հանրապետության հրապարակում ակցիա էին ցանկացել անել «Ազատագրական շարժման» անդամները, սակայն նրանց մի մասին ոստիկանները գրեթե անմիջապես բերման էին ենթարկել` ձեռքներին Նիկոլ Փաշինյանի ծաղրանկարներ ունենալու համար, տեղեկացնում է Sputnik Արմենիա-ն։