Ոստիկանները բերման ենթարկեցին Ավետիք Չալաբյանին

Ոստիկանությունը խուզարկություն է արել «5165» շարժման համախոհ, «Արար» հիմնադրամի համահիմնադիր, հասարակական-քաղաքական գործիչ Ավետիք Չալաբյանի բնակարանում, ապա նրան բերման ենթարկել ոստիկանության Արաբկիրի բաժին։

«Խուզարկությունը իրականացվել է օրինական թույլտվությամբ, խուզարկության հետևանքով ոչ մի բան չի հայտնաբերվել և չէր էլ կարող հայտնաբերվել։ Սակայն, ոստիկանության աշխատակիցները պահանջում են, որ ես գնամ ոստիկանական բաժանմունք, բայց դրա համար հիմքեր չեն ներկայացնում։ Ես այդպես կոչված՝ քրեական գործով որևէ դատավարական կարգավիճակ չունեմ։ Ամեն դեպքում ես պատրաստ եմ փաստաբանիս հետ գնալ ոստիկանական բաժանմունք և օժանդակել գործի քննությանը, որը ցույց կտա, որ հարուցված քրգործը ինձ հետ կապ չունի»,– լրագրողների հետ զրույցում ասաց Ավետիք Չալաբյանը, որից անմիջապես հետո ոստիկանները բռնեցին նրա թևերից և նստեցրին ոստիկանական մեքենա։

Ավետիք Չալաբյանը սա որակեց որպես առևանգում, տեղեկացնում է News.am-ը։

Հիշեցնենք, որ դիմակավոր ոստիկանները խուզարկել էին նաև ՀՅԴ ԳՄ անդամ Սուրեն Մանուկյանի տունը, որտեղ ոչինչ չէին գտել։ Նա լրագրողների հետ զրույցում ասել է, որ այդ գործընթացն իր նկատմամբ քաղաքական հետապնդում է։