Փաշինյան․ Բրյուսելում արձանագրվել են ՀՀ–ի ու Ադրբեջանի դիրքորոշումների տարբերությունները
Բրյուսելյան հանդիպումների արդյունքում արձանագրվել են Հայաստանի ու Ադրբեջանի դիրքորոշումների տարբերությունները։ Այսօր ԱԺ–ում կառավարության հետ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը` պատասխանելով բրյուսելյան հանդիպումներին վերաբերող հարցին։
«Այդ տարբերություններն արտահայտված են հրապարակայնորեն։ Ադրբեջանը համարում է, որ ԼՂ հիմնախնդիրը լուծված է, Հայաստանը համարում է, որ ԼՂ հիմնախնդիրը լուծված չէ։ Եվ խաղաղության բանակցությունների հնարավոր համատեքստում Ադրբեջանը ներկայացրել է իր 5 սկզբունքները, մենք ներկայացրել ենք մեր դիտարկումներն ու օրակարգը այդ կապակցությամբ»,– ասաց Փաշինյանը։
ՀՀ վարչապետը շեշտեց, որ Հայաստանի ներկայացրած սկզբունքներում արձանագրված է ԼՂ հայության անվտանգությունը, իրավունքները և ԼՂ վերջնական կարգավիճակի ճշգրտումը։
«Եվ քանի որ քննարկումների արդյունքում ձևակերպումների շուրջ կողմերի միջև համաձայնություն ձեռք չի բերվել, ԵՄ խորհրդի նախագահը որոշել է իր կողմից անել քոմենթներ, որոնք իր կարծիքով կամ իր տեսակետով հնարավորինս շատ էլեմենտներ կարտահայտեր երկու կողմերի դիրքորոշումներից»,– ասաց նա` արձագանքելով Ղարաբաղի էթնիկ հայ բնակչության անվտանգության ու իրավունքների մասին Շառլ Միշելի հայտարարության շուրջ Հայաստանում հնչող մեկնաբանություններին, տեղեկացնում է Sputnik Արմենիա-ն։