Ընդդիմադիրներին մանդատներից զրկելու հարցով ԱԺ խորհրդի արտահերթ նիստը չկայացավ. քվորում չկա

Քվորում չլինելու պատճառով ԱԺ խորհրդի արտահերթ նիստը չի կայացել: Նիստը հետաձգվել է երկու ժամով:

Նիստի օրակարգում Ազգային ժողովի պատգամավորների լիազորությունները դադարեցնելու հարցով Սահմանադրական դատարան դիմելու մասին հարցն է:

Ազգային ժողովի խորհուրդը Սահմանադրական դատարան է դիմելու ընդդիմադիր «Հայաստան» խմբակցության բոլոր և «Պատիվ ունեմ» խմբակցության չորս պատգամավորներին մանդատներից զրկելու հարցով։

Ցանկից բացակայում են «Պատիվ ունեմ» խմբակցության անդամ Թագուհի Թովմասյանի և նույն խմբակցությունից դուրս եկած Իշխան Զաքարյանի անունները։

Ազգային ժողովի նախագահ Ալեն Սիմոնյանը «շատ հաճելի» էր որակել ընդդիմադիրներին մանդատներից զրկելու գործընթացը:

Լրագրողներն ԱԺ նախագահից հետաքրքրվել էին՝ մանդատների մասով ի՞նչ գործընթաց է սկսվել խորհրդարանում, Սիմոնյանն էլ արձագանքել էր. «Շատ հաճելի»:

Հարցին՝ լինելո՞ւ է այդ գործընթացը, թե՞ ոչ` ԱԺ նախագահը պատասխանել էր. «Օրենքի պահանջ է, չի կարող չլինել»:

Aysor.am