ՀՀ ՊՆ․ Ադրբեջանական կրակոցից վիրավորում ստացած զինծառայողին վիրահատել են
Հայ–ադրբեջանական սահմանագոտում տեղակայված մարտական դիրքում հակառակորդի կրակոցից հրազենային վիրավորում ստացած շարքային Պարույր Խաչատրյանին վիրահատել են։ Տեղեկությունը Sputnik Արմենիայի հետ զրույցում հայտնեց ՀՀ պաշտպանության նախարարի մամուլի խոսնակ Արամ Թորոսյանը։
«Նա զինվորական հսոպիտալում վիրահատվել է, ամեն ինչ բարեհաջող է անցել։ Կյանքին վտանգ չի սպառնում»,– ասաց Թորոսյանը։
Հիշեցնենք` ՀՀ պաշտպանության նախարարությունը երեկ հայտնեց, որ Հայաստան–Ադրբեջան սահմանի արևելյան հատվածում թշնամու կրակոցից ժամկետային զինծառայող է վիրավորվել, նրա վիճակը գնահատվում է ծայրահեղ ծանր:
ՀՀ քննչական կոմիտեն ավելի ուշ տեղեկացրեց, որ քրեական վարույթ է նախաձեռնվել Ադրբեջանի զինված ուժերի կողմից ժամկետային զինծառայող, շարքային Պարույր Խաչատրյանին հրազենային վիրավորում պատճառելու դեպքի առթիվ:
