Արմեն ԱՇՈՏՅԱՆ․ Ի՞ՆՉ ԿՇԱՀԻ ՀԱՅԱՍՏԱՆԸ ՌՈՒՍԱՍՏԱՆԻ ԴԵՄ ԴԵՄԱՐՇԻՑ (ՏԵՍԱՆՅՈՒԹ)
Ի՞նչ կշահի Հայաստանը Ռուսաստանի դեմ դեմարշից. Եթե հույսը Ֆրանսիան է, ապա ապարդյուն․ Փարիզը զորք չի ուղարկի Հարավային Կովկաս։ Ոչ մի փաստաթղթում այդ մասին նշված չէ։ Այս մասին դեկտեմբերի 28-ին լրագրողների հետ հանդիպմանն ասաց Հայաստանի Հանրապետական կուսակցության փոխնախագահ Արմեն Աշոտյանը։
«Հայաստանի անվտանգության խորհրդի քարտուղար Արմեն Գրիգորյանի վերջին հարցազրույցի հայտարարությունները քաղաքական շահարկում են։ Ակնհայտ է, որ տղաները տարվել են խաղով։
Երբ անդամակցում ես որևէ միջազգային կազմակերպության, ապա դելեգացնում են այդ կազմակերպության որոշակի գործառույթները։ Բոլորն են այդպես անում։
Սակայն ՌԴ-ի և Բելառուսի Միութենական պետության մասին համաձայնագրում վերպետական քաղաքական փաստաթուղթ չկա։ Բացի այդ, ոչ մի կազմակերպություն չի ցանկանում խնդրահարույց երկրի ներառել իր կազմի մեջ։ Ինչ-որ մեկին թվում է, թե հիմա ինչ-որ մեկը կցանկանա, որ Հայաստանը լինի վերպետական մարմնի մա՞ս»,- պարզաբանեց Աշոտյանը։
Ըստ նրա՝ Գրիգորյանը չհերքեց նաև հաղորդավարի հարց-կասկածն այն մասին, թե իշխանությունները հրաժարվել են Արցախից։
«Գրիգորյանը ստեց, որ դիտորդական առաքելությունը չի մեկնել Հայաստանից։ Հայաստան է ժամանել տեխնիկական խումբ, որն իր կարգավիճակով շատ ավելի ցածր է, քան նախորդ առաքելությունը։ Այդ տեխնիկական խումբը պետք է ուսումնասիրի հաջորդ տարի նոր դիտորդական առաքելություններ ուղարկելու հնարավորությունը:
Ու՞մ պատճառով առաքելությունը չի շարունակվել։ Ստացվում է, որ Ադրբեջանի՞։ Թեև ԵՄ-ն անգամ մեկ երկրի համաձայնության դեպքում կարող է այդ երկիր առաքելություն ուղարկել, բայց Փաշինյանն անգամ դրան չկարողացավ հասնել։ ԵՄ-ն առաքելության արդյունքներով պարտավոր էր մեղադրել Ադրբեջանին, բայց չարեց դա», – ընդգծեց նա։
Նա վստահություն հայտնեց, որ եթե Հայաստանը ցանկանա, ապա ԵԱՀԿ Մինսկի խմբի նախագահության ձևաչափը կվերականգնվի։
Ընթանում է Ալիևի ու Փաշինյանի համատեղ խաղը
Կա կարգավորման բրյուսելյան տարբերակը, ըստ որի՝ Հայաստանը լվանում է ձեռքերը Արցախից, և Արցախը դիտարկվում է որպես Ադրբեջանի մաս,- ասաց Հայաստանի Հանրապետական կուսակցության փոխնախագահը։
«Թող իշխանությունները հերքեն, և ես այդ ժամանակ կհրապարակեմ փաստաթուղթը»,- հավելեց նա։
Աշոտյանը վստահություն հայտնեց, որ Ալիևն ու Նիկոլ Փաշինյանը Լաչինի միջանցքի շուրջ համատեղ աշխարհաքաղաքական խաղ են խաղում՝ Ռուսաստանին հարված հասցնելու համար, և այս ամենը Հայաստանի շահերի հաշվին։
Նրա կարծիքով ռուս խաղաղապահները Արցախի ժողովրդի ֆիզիկական անվտանգության առաքելությունն իրականացնում են, իսկ գործառույթներից մեկը՝ (Լաչինի միջանցքի երկայնքով անխափան հաղորդակցության ապահովում) ոչ։
ՀՀԿ փոխնախագահը կոչ արեց սա հստակ տարբերակել։
«Ինչու՞ Հայաստանը չի բարձրացնում խաղաղապահների մանդատի հստակեցման մասին հարցը։ Ինչու՞ որպես նախապայման չի դրվում գերիների վերադարձի պահանջը։ Ադրբեջանի ԱԳ նախարարը հաստատեց, որ Արցախի կարգավիճակը սերունդներին թողնելու հարցն առաջարկել է Ռուսաստանը, այլ ոչ թե Հայաստանը, ինչպես պետք է լիներ»,- ընդգծեց Աշոտյանը։
Նա հիշեցրեց այսպես կոչված «անկլավների» խնդրի բացակայության վերաբերյալ Հայաստանի իշխանությունների հավաստիացումների մասին։
«Երեկ պարզվեց, որ նման հարց կա։ Բացի այդ, իշխանությունները հարցազրույց են տալիս, որտեղ հայտնվում է քարտեզ, որի վրա այս, այսպես կոչված, «անկլավները» գտնվում են Հայաստանի տարածքից դուրս։ Էդմոն Մարուքյանն ավելի վաղ ասել էր, որ Բերձորը հանձնել են, որպեսզի չհանձնեն այսպես կոչված Զանգեզուրի միջանցքը։ Այսինքն՝ իշխանություններն ամեն ինչ հանձնում են՝ արդարանալով դրանով, թեև նոյեմբերի 9-ի հայտարարության մեջ Սյունիքի տարածքով միջանցքի մասին խոսք չկա»,- եզրափակեց ՀՀԿ փոխնախագահը։
Ընդդիմությունը չհասավ իր նպատակին
Ընդդիմությունն այս տարի չհասավ իր նպատակին, գործընթացը շարունակվում է, բայց արդյունք չկա,- ասաց Աշոտյանը։
«Դա այդպես է, քանի դեռ իշխանության է Փաշինյանը, որքան էլ ընդդիմությունը խոսի բազմահազարանոց ակցիաների մասին։
Սակայն սա դատավճիռ չէ, բայց սա ամբողջ ընդդիմության աշխատանքի ախտորոշումն է, այդ թվում մեր կուսակցության։ Չեմ ուզում ինքնախաբեությամբ զբաղվել», – հավելեց նա։
Աշոտյանը կարծում է, որ ընդդիմությունում կա երեք ճգնաժամ՝ անձերի, մեթոդաբանության և օրակարգի։
Ռուս գործընկերներ, մի հրաժարվեք Լեռնային Ղարաբաղի խնդրից
Հարգելի ռուս գործընկերներ, մի հրաժարվեք Լեռնային Ղարաբաղի խնդրից,- շարունակեց ՀՀԿ-ի փոխնախագահը։
«Միգուցե, այս խնդիրը ձեզ խանգարում է առաջ տանել աշխարհում Ռուսաստանի դերի մասին ձեր նոր նարատիվը, բայց մի հրաժարվեք այդ խնդրից, այն գոյություն ունի։ Մի ստեղծեք նոր նարատիվներ՝ առանց հաշվի առնելու տարածաշրջանի իրական վիճակը, որը կենսական նշանակություն ունի նաև Ռուսաստանի Դաշնության համար։
Ուկրաինայի պատերազմի պատճառով աշխարհաքաղաքական պարադոքս է ստեղծվել։ Ռուսաստանի դերը հեռավոր արտասահմանում մեծացել է։ Մերձավոր արտասահմանում Ռուսաստանի դերը աղետալիորեն ընկնում է և Կենտրոնական Ասիայում, և Միջին Ասիայում և Հարավային Կովկասում»,- ասաց նա։
2022 թվականի Հայաստանի գլխավոր դիվանագիտական կորուստները
2022 թվականին Հայաստանը մի շարք դիվանագիտական կորուստներ կրեց,- ասաց Արմեն Աշոտյանը։
«Առաջինը՝ միջազգային փաստաթղթերում Արցախի ինքնորոշման հարցի բացակայությունն է՝ որպես ղարաբաղյան հիմնախնդրի կարգավորման հիմնական սկզբունք։
Երկրորդ՝ պարալիզացված ԵԱՀԿ Մինսկի խմբի պայմաններում Փաշինյանը հիմնավորեց երկկողմ և բազմակողմ ձևաչափերով Արցախի վաճառքը շարունակելու անհրաժեշտությունը։ Փոխարենը պետք էր խնդրել ու պահանջել ԵԱՀԿ Մինսկի խմբի գործունեության վերականգնումը։
Երրրորդ կորուստը 2022 թվականին ընդունված փաստաթղթերում «Լեռնային Ղարաբաղ» ձևակերպման բացակայությունն է։
Լեռնային Ղարաբաղը, որպես միջազգային քաղաքականության սուբյեկտ, Փաշինյանի կանխամտածված քաղաքականության արդյունքում դուրս եկավ միջազգային փաստաթղթաշրջանառությունից։ Փաստաթղթերում չկա Արցախի ժողովուրդ, այլ կա Լեռնային Ղարաբաղի բնակչություն»,- ասաց նա։
Տարվա ընթացքում մարդկային կորուստները՝ 265 զինծառայող, տարածքային կորուստները՝ 160 քմ
Հայաստանի զինված ուժերում այս տարի մարտական և ոչ մարտական կորուստները կազմել են 265 մարդ։ Հայաստանի տարածքի 140-160 քառակուսի կիլոմետրը չի վերահսկվում Հայաստանի կողմից,- ասաց Հայաստանի Հանրապետական կուսակցության փոխնախագահը։
«Հայաստանը թողեց Արցախը, բայց հայ ժողովուրդը չթողեց Արցախը։ Մենք ստիպված ենք տարբերակել Հայաստանն ու հայ ժողովրդինն։ Արտաքին շահերը սպասարկող Հայաստանի իշխանությունները մի բան է, իսկ հայ ժողովուրդը՝ մեկ այլ։ Հայաստանի Հանրապետությունը երկու տարի չի ներկայացնում Հայաստանի ժողովրդին»,- ասաց նա։
Աշոտյանը հույս հայտնեց, որ 2023 թվականից ՀՀ-ն կսկսի ներկայացնել հայ ժողովրդին, որի շահերը պետք է ներկայացնեն իշխանությունները։
«Փաշինյանը դեռևս իշխանության է և դա անարդար է մեր ժողովրդի և մեր պետության հանդեպ։ Դեռ կան մահացած տղաների չնույնականացված մարմիններ, իսկ ադրբեջանական բանտերում դեռ կան հայ գերիներ, դեռ կան անհայտ կորածներ»,- հիշեցրեց նա։
ՀՀԿ-ի երիտասարդ ներկայացուցիչներին հետապնդում են
ՀՀԿ երիտասարդ ներկայացուցիչներ Միքայել Գրիգորյանին ու Վլադիմիր Մանուկյանին հետապնդում են և մեղադրում ապօրինի զենք պահելու մեջ,- շարունակեց Արմեն Աշոտյանը։
«Երեկ Մանուկյանին կոպիտ ձևով դիմակներով երկու մետրանոց վերզիլաները բերման են ենթարկել, իսկ Գրիգորյանին մեքենայով են հետևում», - նշեց նա։
Աշոտյանը կոչ արեց «այդ վերզիլաներին» գնալ Լաչինի միջանցք և բացել ճանապարհը, այլ ոչ թե «Երևանում երիտասարդների առևանգել»։
«Միքայել Գրիգորյանը և Վլադիմիր Գրիգորյանը համարձակվել են հայտնվել Փաշինյանի դստեր հետ նույն տեղում։ Իշխանությունը կորցրել է ադեկվատությունը», – ասաց Աշոտյանը։
Նա Փաշինյանին կոչ արեց երեխաներին չներքաշել քաղաքականության մեջ։
News.am-ի նյութերով
