Սուրեն ՍԱՐԳՍՅԱՆ․ ԱՄՆ-Ն ԱԴՐԲԵՋԱՆԻ ԴԵՄ ԵՐԲԵՔ ՊԱՏԺԱՄԻՋՈՑ ՉԻ ԿԻՐԱՌԵԼՈՒ (ՏԵՍԱՆՅՈՒԹ)
Ամերիկան Ադրբեջանի դեմ երբեք պատժամիջոց չի կիրառելու, որովհետև Ադրբեջանն ԱՄՆ-ի համար ոչ պակաս կարևոր երկիր է, քան Հայաստանը, եթե ոչ ավելի կարևոր: Այս մասին News.am-ի հետ զրույցում նշեց միջազգայնագետ Սուրեն Սարգսյանը:
«Մի մոռացել պետքարտուղարության այն հայտարարությունը, որ եթե Իրան-Ադրբեջան ռազմական բախում լինի, ապա ԱՄՆ-ն Ադրբեջանի կողքին են կանգնելու: Այսինքն Իրանին պատերազմական գործողությունների մեջ ներքաշելու լավագույն միջոցներից մեկը դիտարկվում է Ադրբեջանը: Այնպես որ սա մեծ խաղի ընդամենը մեկ բաղադրիչն է: Այնպես որ Ադրբեջանի դեմ պատժամիջոց չեն կիրառի: Ի դեպ, Ադրբեջանի դեմ պատժամիջոց կիրառվել է, 10 տարի գործել է 907-րդ բանաձևը, որը հենց պատժամիջոց է եղել և հենց Լեռնային Ղարաբաղի համար:
ԱՄՆ-ն Ադրբեջանին օգնություն տրամադրում է բացառապես անվտանգային տեսակի: Այսինքն ոչ թե ռազմական, այլ անվտանգային օգնություն: Դրա նպատակը Իրանի հետ ծովային սահմանի պաշտպանությունն է: վերջին 2-3 տարիներին, որ Ադրբեջանին շուրջ 100 մլն դոլարի օգնություն է տրամադրվել, դա չի տրամադրվել Հայաստանի դեմ, տրամադրվել է Իրանի դեմ»,-ասաց նա:
Սուրեն Սարգսյանը նաև նկատեց, որ ԱՄՆ-ն մինչև պատժամիջոցներին հասնելը շատ լուրջ դիվանագիտական գործիքներ ունի, որ կարող են կիրառվել. «Դեռևս այդ գործիքներն ԱՄՆ-ն չի սպառել, և համարյա զրոյական հվանականություն կա, որ ինչ-որ ձևով Ադրբեջանի նկատմամբ կկիրառվեն ինչ-ինչ պատժամիջոցներ»,-համոզմունք հայտնեց միջազգայնագետը:
