ԵՄ առաքելությունը օգտակար տեղեկություններ է տալիս որոշումների ընդունման համար. Կոլոննա
Պաշտոնական այցով Հայաստանում գտնվող Ֆրանսիայի արտաքին գործերի նախարար Կատրին Կոլոննան այսօր այցելել է ադրբեջանական ագրեսիայից տուժած Ջերմուկ քաղաք։ Տեղեկությունը հայտնում է «Արմենպրես» լրատվական գործակալությունը։
Կոլոննային ուղեկցել է ՀՀ Անվտանգության խորհրդի քարտուղար Արմեն Գրիգորյանը։
Ջերմուկում նրան դիմավորել են ՀՀ ԶՈւ Գլխավոր շտաբի պետ Էդվարդ Ասրյանը, Վայոց Ձորի մարզպետ Արարատ Գրիգորյանը և ԵՄ քաղաքացիական առաքելության ղեկավար Մարկուս Ռիտերը:
Կոլոննան շնորհակալություն է հայտնել ԵՄ քաղաքացիական առաքելությանը կատարած աշխատանքի համար և նշել, որ համագործակցությունը ՀՀ ԶՈւ–ի հետ դրական արդյունք է տալիս։
«Այն մեզ թույլ է տալիս տեղեկություններ ստանալ, որոնք օգտակար են Եվրամիության անդամ երկրներինորոշումների ընդունման հարցում։ Սա քաղաքացիական առաքելություն է, զինված չէ, նպատակը միայն իրավիճակին հետևելն է, բայց այն թույլ է տալիս լարվածությունը թուլացնել»,-ասել է նա։
Էդվարդ Ասրյանն էլ իր հերթին բարձր է գնահատել առաքելության աշխատանքը Հայաստանում և հավելել, որ այդ աշխատանքով ադրբեջանական ԶՈւ-ն իրեն առավել զսպված է զգում։
Ֆրանսիացի նախարարը շնորհակալություն է հայտնել ներկաներին տարածաշրջանում խաղաղությանը նպաստող մթնոլորտի ձևավորմանն ուղղված ջանքերի համար: