Անհեթեթության եզրին. Նիկոլն ուզում է երկրի համար «կադաստրային վկայական» ստանալ

«Ինչո՞ւ 86.6 հազար ք/կմ և 29.8 հազար ք/կմ, որովհետև այդտեղից գալիս է հարցը, թե ո՞րն է այն տարածքային ամբողջականությունը, որը ճանաչում ենք, որովհետև Ադրբեջանն ունի հստակ խոսույթ, ասում է, որ եթե դուք մեր տարածքային ամբողջականությունը չեք ճանաչում, մենք էլ ձեր տարածքային ամբողջականությունը չենք ճանաչում և այս խոսակցությունը տեղի է ունենում միջազգային հանրության աչքի առաջ»,-խորհրդարանում հայտարարեց Նիկոլ Փաշինյանը:

Նրա խոսքով՝ երբ Ադրբեջանը շարունակաբար հարձակվում է ՀՀ-ի վրա և միջազգային հանրության հետ ՀՀ-ն երկխոսություն է ունենում, Ադրբեջանն էլ ասում է, որ Հայաստանն էլ իր տարածքային ամբողջականությունը չի ճանաչում և իրենց վրա է հարձակվել կամ հարձակվում:

«Ինչ են ասում՝ հա մենք Ադրբեջանի տարածքային ամբողջականությունը չենք ճանաչում, ենթադրեք, և եթե նա հարձակվի մեր վրա, օրինակ, ՀԱՊԿ-ը կգա մեր կողքը կկանգնի: ՀԱՊԿ-ն էլ այդ հարձակումների ժամանակ ասում է՝ այո կգամ ձեր կողքը կկանգնեմ, բայց 30 հոգի շատ ուժեղ դիտորդ կուղարկեմ: Այստեղ պետք է որոշում կայացնենք՝ մենք կարող ենք ասել, որ մենք չենք ճանաչում Ադրբեջանի 86.6 հազար ք/կմ-ն և մեր կարծիքով Ադրբեջանը ոչ թե 86.6 հազար ք/կմ է այլ 45.7 հազար ք/կմ: Իրենք էլ կասեն՝ շատ լավ, ուրեմն մեր կարծիքով էլ Հայաստանը ոչ թե 29.8 հազար ք/կմ է, այլ՝ 8700ք/կմ»,-մեկնաբանեց Նիկոլ Փաշինյանը և ԱԺ ամբիոնից կրկին հայտարարեց, որ ՀՀ-ն վերահաստատում է Բրյուսելում հաստատված պայմանավորվածությունը, որ ՀՀ-ն ճանաչում է Ադրբեջանի 86.6 հազար ք/կմ-ն և հույս հայտնեց, որ Ադրբեջանն էլ կվերահաստատի, որ ճանաչում է Հայաստանի 29.8 հազար ք/կմ-ն:

ՀՀ գործադիր մարմնի ղեկավարը շարունակեց՝ ասելով. «Նրանք, ովքեր ասում են, որ Ադրբեջանը 86.6 հազար ք/կմ չէ, այլ մինուս X թիվ է, նրանք միևնույն ժամանակ ասում են, որ ՀՀ-ն 29.8 հազար ք/կմ չէ, այլ մինուս X ինչ-որ թիվ է, ինչքան թիվ է՝ էդ էլ կորոշվի նրանից, թե էդ օրը ՀԱՊԿ-ում ինչ տրամադրություն է տիրելու»:

Փաշինյանը, հայտնելով, որ համաձայնության երեք փուլ է տեղի ունեցել, ասաց, որ առաջինում ճանաչել են Ալմա Աթայի հռչակագիրը, երկրորդում՝ Պրահայում այդ հռչակագրի վերահաստաումն է եղել և երրորդը քայլը Բրյուսելում տարածքների փոխադրաձ ճանաչումն է կոնկրետ նշագրումներով իսկ հաջորդը պետք է լինի քարտեզի վրա այդ տարածքի որոշումը:

«Այստեղ մենք պետք է վերցնենք Խորհրդային միության քարտեզները, և մեր դիրքորշումն այն է, որ դրա համար հիմք պետք է ծառայեն 1975 թվականի Խորհրդային Միության Գլխավոր շտաբի քարտեզները, ոնց որ թե, սա կամաց-կամաց ոչ միայն մեր դիրքորոշումն է, այլև միջազգային գործընկերներ էլ են սկսում այդ խոսույթը որդեգրել և օգտագործել, ինչը ես համարում եմ շատ կարևոր»,-ասաց Փաշինյանը:

Նա նաև հայտարարեց որ հայաստանը չունի կադաստրի վկայական:

«Մենք ապրում ենք մի տեղ, որտեղ առնվազը մի քանի պետություն կա, որ երբ ուզի կասի՝ մի հատ հավաքվեք այստեղից դուրս եկեք և մենք այդ ժամանակ չենք կարա ասել՝ հլը մի րոպե, բա կադաստրի վկայականը»,-հայտարարեց Փաշինյանը:

Panorama.am