ԽՆՁՈՐԸ ԾԱՌԻՑ…

Գայանե Հակոբյանը՝ 44-օրյա պատերազմում զոհված Ժորա Մարտիրոսյանի մայրը, կրկին կալանավորվեց 1 ամիս 15 օր ժամկետով: ՀՀ վարչապետ Նիկոլ Փաշինյանի որդուն՝ 44-օրյա պատերազմի հերոսական մասնակից Աշոտ Փաշինյանին «առևանգելու» համար:

ՀԱԿՈԲՅԱՆԸ ԿԱԼԱՆՔԻ ՏԱԿ Է ՄԱՅԻՍԻ 20-ԻՑ: Հունիսի 5-ին Վերաքննիչ դատարանը փոխեց խափանման միջոցը տնային կալանքի։ Այնուհետ առաջին ատյանի դատարանում պաշտպանող կողմը փորձեց հասնել խափանման միջոցի մեղմացման կամ ընդհանրապես չեղարկման: Բայց այդժամ վրդովվեց «տուժողը»՝ ՀՀ վարչապետ Նիկոլ Փաշինյանի որդի, 44-օրյա պատերազմի հերոսական մասնակից Աշոտ Փաշինյանը։ Նա հայտարարեց, թե պաշտպանող կողմը «մաքսիմալիստական մոտեցումներով» է հարցին մոտենում, Գայանե Հակոբյանին կալանքից ազատելը կարող է սպառնալ հանրային անվտանգությանը և ընդհանրապես... «Նույնիսկ տնային կալանքը կարող է մեղմ համարվել այս դեպքի համար. տեղի է ունեցել ծանր հանցագործություն»,- ասաց վարչապետ Նիկոլ Փաշինյանի որդին՝ 44-օրյա պատերազմի հերոսական մասնակից Աշոտ Փաշինյանը, նկատի ունենալով իր «առևանգումը»: Եվ դատարանը որոշեց, որ Գայանե Հակոբյանը պետք է մի քիչ էլ նստի...

Ավելի վաղ դատարանի շենքի առջև վարչապետ Նիկոլ Փաշինյանի որդին՝ 44-օրյա պատերազմի հերոսական մասնակից Աշոտ Փաշինյանը լրագրողներին էր ներկայացրել 44-օրյա պատերազմում զոհված Ժորա Մարտիրոսյանի մոր՝ Գայանե Հակոբյանի կողմից իր «առևանգման» սեփական վարկածը: «Տուժողի» խոսքերով, ինքը, այո, հոժարակամ է նստել Գայանե Հակոբյանի մեքենան, որ պարզապես զրուցի: Բայց մեքենայում իմացել է, որ գնում են զինվորական փառքի Եռաբլուր պանթեոն, որտեղ հանգչում է Ժորա Մարտիրոսյանը։ Վարչապետ Նիկոլ Փաշինյանի որդին՝ 44-օրյա պատերազմի հերոսական մասնակից Աշոտ Փաշինյանը ցանկացել է իջնել մեքենայից, սակայն Գայանե Հակոբյանը թույլ չի տվել: Այդժամ վարչապետ Նիկոլ Փաշինյանի որդի և 44-օրյա պատերազմի մասնակից Աշոտ Փաշինյանը, որսալով պահը, երբ մեքենան շարժվում էր ցածր արագությամբ, հերոսաբար դուրս է նետվել մեքենայից։ Բնավ ոչ հեռու այն վայրից, որտեղ մինչ այդ իր կամքով նստել էր մեքենան։ Այսպիսով, «առևանգումը» տեղի չի ունեցել, իսկ վարչապետ Նիկոլ Փաշինյանի որդին՝ 44-օրյա պատերազմի հերոսական մասնակից Աշոտ Փաշինյանը հայց է գրել Գայանե Հակոբյանի դեմ՝ մեղադրելով նրան ծանր հանցագործության մեջ, քանի որ Գայանե Հակոբյանը ցանկացել է գնալ Եռաբլուր, իսկ ինքը չի ցանկացել:

... Հիշում եմ, մի անգամ տրոլեյբուս էի նստել ընկերոջս հետ: Նա շարունակ հրավիրում էր ինձ իր տուն: Ես հրաժարվում էի, նա պնդում էր: Ի վերջո դուրս ցատկեցի կանգառում: Այ հիմա մտածում եմ, որ պետք էր մեղադրել նրան առևանգության փորձի մեջ: Եվ առնվազն ֆինանսական փոխհատուցում պահանջել՝ ծանր հանցագործություն կատարելու փորձով պատճառած բարոյական վնասի համար: Ես, ի տարբերություն Աշոտ Փաշինյանի, «առևանգման» վկաներ էլ ունեի. մի ամբողջ տրոլեյբուս...

Կատակը մի կողմ, դժվար է ասել, թե որ տեսարանն է ավելի խայտառակ. այդ դատական զավեշտը, թե 44-օրյա պատերազմի հերոսական մասնակից Աշոտ Փաշինյանի հոր մասնակցությունը Էրդողանի երդմնակալության տոնական միջոցառումներին. այն մարդու տոնին, որը պատասխանատու է 44-օրյա պատերազմի հրահրման և այդ պատերազմում ագրեսորին աջակցելու համար։

Հակոբյանի փաստաբան Գեորգի Մելիքյանը նիստի ավարտից հետո լրագրողներին ասաց, որ Հակոբյանի կալանքը երկարաձգելու որոշումը կայացվել է բարձր մակարդակով, Նիկոլ Փաշինյանը ճնշում է գործադրել դատարանի վրա: Փաստաբանի կարծիքով, Հակոբյանին կրկին կալանավորեցին, քանի որ չարդարացավ հաշվարկը, թե նա կընկճվի և, ի երախտագիտություն խափանման միջոցը տնային կալանքի փոխելու՝ կընդունի հերոսական Աշոտ Փաշինյանին «առևանգելու» մեղքը: Ավելի վաղ Հակոբյանի կամավոր ապաշխարումից հետո դատական հետապնդումը դադարեցնելու այդպիսի հնարավորության մասին իր վերջին ասուլիսում ակնարկեց նաև վարչապետը՝ 44-օրյա պատերազմի հերոսական մասնակից Աշոտ Փաշինյանի հայր Նիկոլ Փաշինյանը:

Հունիսի 10-ը Ժորա Մարտիրոսյանի ծննդյան օրն է։