Կարմիր խաչի միջնորդությամբ Արցախից 7 բուժառու է տեղափոխվել Հայաստան

Արցախից 7 բուժառու այսօր Կարմիր խաչի միջնորդությամբ և ուղեկցությամբ տեղափոխվել է ՀՀ մասնագիտացված բուժկենտրոններ։ Տեղեկությունը հայտնում է Արցախի առողջապահության նախարարությունը։

Նշվում է, որ նրանք տեղափոխվել են «Հանրապետական բժշկական կենտրոն» ՓԲԸ-ից` անհետաձգելի մասնագիտացված բժշկական օգնություն ստանալու համար։

«Նախատեսվում է օրվա ընթացքում ԿԽՄԿ մեքենաներով Արցախ վերադարձնել 7 բուժառուների՝ ուղեկցողների հետ միասին, ովքեր ժամանակին պետական պատվերի շրջանակներում ուղեգրվել են ՀՀ` բուժում ստանալու»,– տեղեկացնում են նախարարությունից։

Շեշտվում է, որ ադրբեջանական կողմը շարունակում է արգելել Կարմիր խաչի մեքենաներով խիստ անհրաժեշտ դեղորայքի և բժշկական պարագաների մատակարարումն Արցախ։

Հավելենք, որ «Արևիկ» բուժմիավորումում այս պահին ստացիոնար բուժում է ստանում 28 երեխա։ Նրանցից 4-ը նորածնային և վերակենդանացման բաժանմունքում են:

Հանրապետական բժշկական կենտրոնում ստացիոնար բուժում է ստանում 85 հիվանդ, 3–ը վերակենդանացման բաժանմունքում են, նրանցից 2-ի վիճակը ծայրահեղ ծանր է գնահատվում։

Sputnik Արմենիա