ՍԱ «ԿԱԴԱՍՏՐԻ ՎԿԱՅԱԿԱՆ» ՉԷ
Այս ընթացքում՝ երեկ, այսօր, կարող եմ ասել, Հայաստանն անսպասելիորեն քաղաքական կոմպետենտություն դրսևորեց, և մենք դա գնահատում ենք։ Մենք դա տեսնում ենք որպես կարևոր գործոն, և կարծում եմ, որ երեկ և այսօր տեղի ունեցած իրադարձությունները դրական ազդեցություն կունենան նաև Ադրբեջանի և Հայաստանի միջև խաղաղ գործընթացի վրա։ Այս մասին հայտարարել Է Ադրբեջանի նախագահ Իլհամ Ալիևը՝ դիմելով ժողովրդին, հաղորդում է News.am-ը։
«Ուզում եմ հուսալ, որ մեր ձեռնարկած քայլերը և հակաահաբեկչական միջոցառումների արդյունքները մեզ թույլ կտան վերջապես վերացնել Հայաստանի կողմից պարտադրված խաղաղ բանակցությունների խոչընդոտը։ Սա Հարավային Կովկասում նոր իրականություն և երկարաժամկետ խաղաղություն կստեղծի։ Մենք պետք է այնպես անենք, որ մյուս կողմը ռևանշիստական գաղափարներով չապրի, և նրանք պետք է այնպես անեն, որ մենք իրենց հողի վրա աչք չունենանք։ Մենք ճանաչում ենք նրանց տարածքային ամբողջականությունը և հայտարարել ենք դա, մենք ճանաչում ենք բոլոր երկրների տարածքային ամբողջականությունը։ Մենք առաջարկում ենք, որ Հարավային Կովկասի երկրների ապագան հիմնված լինի խաղաղության, հանգստության և զարգացման վրա։ Այս տարածաշրջանը դարեր շարունակ եղել է վեճերի, պատերազմների ու արյունալի բախումների վայր»։
ԲԱՅՑ ԱՆՀՆԱՐ Է ԼՌԵԼ. ՎԵՐՋԱՊԵՍ ԱԼԻԵՎԸ ՀԱՅՏԱՐԱՐԵՑ, ԹԵ ՃԱՆԱՉՈՒՄ Է ՀԱՅԱՍՏԱՆԻ ՏԱՐԱԾՔԱՅԻՆ ԱՄԲՈՂՋԱԿԱՆՈՒԹՅՈՒՆԸ։ Սա, թերևս, կարելի է դիտարկել որպես պարգև «անսպասելիորեն դրսևորած քաղաքական կոմպետենտության» համար։ Բայց…
Ոմանք համարում են, որ Ադրբեջանի նախագահի այս հայտարարությունը հենց այն «կադաստրի վկայականն» է, որի մասին դեռ ամիսներ առաջ խոսում էր Փաշինյանը։ Իրականում դա բնավ այդպես չէ։ Պայմանական «կադաստրի վկայականում» պետք է հստակ նշված լինեն տարածքների մակերեսները, մինչդեռ ալիևյան հայտարարության մեջ դա չկա։ Ադրբեջանի նախագահը չի ասում, որ ճանաչում է Հայաստանի տարածքային ամբողջականությունը 29 800 քառակուսի կիլոմետրի սահմաններում։ Հիշեցնենք, որ Փաշինյանը հայտարարել էր, որ փոխադարձության պայմանով ճանաչում է Ադրբեջանի տարածքը 86.600 քառակուսի կիլոմետր մակերեսով, Արցախը ներառյալ: Այսինքն Ալիևը պետք է նշեր թվերը, ինչը չարեց։ Եվ չարեց մի պարզ պատճառով։ Նրա համար նշյալ տարածքները փոփոխական մեծություն են:
Ճանաչելով նշված տարածքները՝ Ալիևը ստիպված կլիներ նախևառաջ դուրս բերել իր զինվորական ստորաբաժանումները հետպատերազմյան տարիներին բռնազավթված Հայաստանի առնվազն 150 քառակուսի կիլոմետր ինքնիշխան տարածքից։ Նա ակնհայտորեն մտադիր չէ դա անել։ Ճանաչելով Հայաստանի տարածքը 29 800 կմ-ի սահմաններում՝ Ալիևը պետք է հրաժարվեր «Զանգեզուրի միջանցքի» գաղափարից և Հայաստանի տարածքի նկատմամբ այլ նկրտումներից։ Նա չի պատրաստվում դա անել։ Ավելին, Հայաստանի տարածքային ամբողջականությունը ճանաչելու մասին ալիևյան հայտարարությանը զուգահեռ՝ ադրբեջանական զորամիավորումները գրոհում են հայկական տարածքը։ Այսպես, ըստ ՀՀ պաշտպանության նախարարության հաղորդագրության, սեպտեմբերի 20-ին՝ ժամը 22:50-ի սահմաններում ադրբեջանական զինուժը գնդակոծել է Սոթք գյուղի մոտակա հայկական դիրքերը։ Ահա այսպես է Բաքուն ճանաչում Հայաստանի տարածքային ամբողջականությունը գործնականում…
Ակնհայտ է, որ Ադրբեջանը, հասնելով Արցախում իր նկրտումների բավարարմանը, առաջ է շարժվում Հայաստանը բռնազավթելու իր ծրագրերում։ Այո, Ալիևն ասաց, որ ճանաչում է ՀՀ տարածքային ամբողջականությունը, բայց թե ինչ մակերեսով՝ չնշեց։ Սա նշանակում է, որ Հայաստանի ինքնիշխան տարածքը նրա համար կրճատման ձգտող փոփոխական մեծություն է։ Ոչ, սա բնավ «կադաստրի վկայական» չէ: Թերևս սա լոկ պարգև է Փաշինյանին՝ «անսպասելիորեն դրսևորած քաղաքական կոմպետենտության» համար։
