Իրանական կողմն ՀՀ-ին առաջարկել է դիտարկել տեխնոլոգիական կենտրոնի ստեղծման հնարավորությունը

Իրանական կողմն առաջարկել է դիտարկել Հայաստանում տեխնոլոգիական և նորարարական կենտրոնի ստեղծման հնարավորությունը, որում ներկայացված կլինի իրանական գիտելիքահենք արտադրանքը։ ՀՀ էկոնոմիկայի նախարարի տեղակալ Ռաֆայել Գևորգյանի հետ հանդիպմանն այդ մասին ասել է ԻԻՀ նախագահի՝ գիտատեխնոլոգիական հարցերով տեղակալի աշխատակազմի՝ տեխնիկական արտահանման ծառայությունների միջանցքի (Tech Export Services Corridor) ղեկավար Ռազիե Քոհանսալը։ Տեղեկությունը հայտնում է ՀՀ էկոնոմիկայի նախարարության մամուլի ծառայությունը։

Նշվում է, որ հանդիպման ընթացքում քննարկվել են երկու երկրների միջև տնտեսության ոլորտում համագործակցության ընդլայնման և առևտրաշրջանառության ավելացմանը վերաբերող հարցեր։ Ռազիե Քոհանսալի գլխավորած պատվիրակության կազմում ընդգրկված են16 կազմակերպությունների ղեկավարներ:

Ռաֆայել Գևորգյանն իր հերթին ներկայացրել է պետության կողմից ընկերություններին տրամադրվող աջակցությունը՝ թողարկման և վարկանիշավորման պետական աջակցության ծրագիրը, ինչպես նաև ընկերություններում նորագույն տեխնոլոգիաների ներդրման ու բարձր որակավորում ունեցող մասնագետների ներգրավման խրախուսման միջոցառումը։

Sputnik Արմենիա