Վարչապետի աշխատակազմի ֆինանսավորումը 2024 թ-ին կավելանա 4.7 մլրդ դրամով

ՀՀ վարչապետի աշխատակազմի ծախսերը 2024 թվականին կավելանան 4.7 մլրդ դրամով (11,7 մլն դոլար) և կկազմի 24 մլրդ 572 մլն դրամ (61,3 մլն դոլար)։ Այս մասին ԱԺ 2024 թվականի պետական բյուջեի նախագծի մշտական հանձնաժողովների նիստում հայտնեց ՀՀ վարչապետի աշխատակազմի ղեկավարի տեղակալ Արմենակ Խաչատրյանը։

«Հիմնական ավելացումները կախված են պետական արդիականացման ծրագրի հետ։ Շուրջ 3 մլրդ դրամի կապիտալ ծախսեր ունենք, որն ընդհանուր պետական կառավարման համակարգում սարքավորումների ձեռքբերման և ծրագրային ապահովումների համար է նախատեսված։ Ծախսերի նախագծով նախատեսված է 2024 թվականին ընդհանուր առմամբ իրականացնել 24 մլրդ 572 մլն դրամի ծախսեր` 11 ծրագրի և 51 միջոցառման շրջանակում»,– ասաց Խաչատրյանը։

Նա ներկայացրեց այդ 11 ծրագիրը` պետական հատվածի արդիականացում, պետական աջակցություն հասարակական և այլ կազմակերպություններին, քաղծառայողների վերապատրաստում, վարչապետի լիազորությունների իրականացման ապահովում և այլն։

«Հայաստան» խմբակցության պատգամավոր Արթուր Խաչատրյանն էլ հայտարարեց, որ կասկածներ ունի այդ միջոցների արդյունավետ ծախսման վերաբերյալ: Մասնավորապես, պատգամավորը դժգոհ է, որ իր հարցումներին ուշացումով են պատասխանում։

Ի պատասխան` աշխատակազմի ղեկավարի տեղակալը նշեց, որ վարչապետի գրասենյակում բոլոր ժամկետները պահպանվում են և փորձում են հնարավորինս արդյունավետ աշխատել:

Sputnik Արմենիա