Սի Ծինփինը ժամանել է ԱՄՆ. կայացել է ԱՄՆ-ի և Չինաստանի ղեկավարների հանդիպումը

ԱՄՆ նախագահ Ջո Բայդենը և Չինաստանի նախագահ Սի Ծինփինը չորեքշաբթի միմյանց ձեռք են սեղմել, երբ հանդիպել են Ասիա-խաղաղօվկիանոսյան տնտեսական համագործակցության համաժողովի շրջանակներում, հայտնում է AP-ն:

Վերջին անգամ երկու երկրների ղեկավարները խոսել են մեկ տարի առաջ, և դրանից հետո երկրների միջև առանց այն էլ լարված հարաբերություններն ավելի են վատթարացել։

Չորեքշաբթի օրվա բանակցությունների արդյունքը կարող է հեռուն գնացող հետևանքներ ունենալ անհանգիստ աշխարհի համար, որը պայքարում է համաշխարհային տնտեսական հակասությունների դեմ, որոնք առաջացել են համավարակի, Մերձավոր Արևելքում և Եվրոպայում պատերազմների, Թայվանի առաջիկա ընտրությունների և այլնի հետևանքով:

Միացյալ Նահանգների և Չինաստանի առաջնորդները Սան Ֆրանցիսկոյի ծոցի տարածքում իրենց անձնական հանդիպումը բացեցին ամուր ձեռքսեղմումով: Այնուհետև նրանք նստեցին մեկ երկար սեղանի մոտ միասին և ոչ թե առանձին-առանձին։

Բայդենն ասել է, որ հանդիպման նպատակը «իրար հասկանալն է»։

«Ինչպես միշտ, դեմ առ դեմ քննարկումներին ոչինչ չի կարող փոխարինել»,- ասել է ԱՄՆ նախագահը

«Մենք իրար վաղուց ենք ճանաչում։ Մենք միշտ չէ, որ համաձայնել ենք»,- հավելել է Բայդենը՝ խոսելով Չինաստանի առաջնորդի մասին։

Բայդենը նաև ասել է, որ չի ցանկանում «որևէ սխալ պատկերացում կամ թյուրիմացություն», և որ երկու առաջնորդները պետք է «ապահովեն, որ մրցակցությունը չվերաճի հակամարտության»:

Իր հերթին Սի Ծինփինը խոսել է կլիմայի փոփոխության դեմ պայքարում համագործակցության ամրապնդման անհրաժեշտության մասին, բայց նաև դատապարտել այն, ինչ անվանել է աճող «պրոտեկցիոնիզմ»:

News.am