ԵՄ-ն աջակցում է Հայաստանի ու Ադրբեջանի միջև բանակցությունների անհապաղ վերսկսմանը

Եվրոպական միությունը լիովին հավատարիմ է և աջակցում է Հայաստանի ու Ադրբեջանի միջև բանակցությունների անհապաղ վերսկսմանը և, որպես արդյունք, խաղաղության պայմանագրի կնքմանը։ Այս հայտարարությունը տարածվել է Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի անունից։

Նշվում է, որ Եվրամիությունը դատապարտել է 2023 թվականի սեպտեմբերի 19-20-ը Ադրբեջանի իրականացրած ռազմական գործողությունը, որի հետևանքով Ղարաբաղի ավելի քան 100 հազար հայեր ստիպված են եղել արտագաղթել։

Ընդգծվում է, որ ԵՄ-ի առաջնահերթությունն է մարդասիրական անխոչընդոտ աջակցության տրամադրումը Լեռնային Ղարաբաղում մնացած և Հայաստան տեղափոխված մարդկանց:

ԵՄ-ն Ադրբեջանին կոչ է արել ապահովել Ղարաբաղի հայերի իրավունքներն ու անվտանգությունը, այդ թվում՝ տեղահանվածների վերադարձի իրավունքը, և թույլ տալ տեղում իրավիճակի շարունակական անկախ մշտադիտարկում իրականացնել՝ ի լրումն ՄԱԿ-ի առաքելությունների այցելությունների:

«ԵՄ-ն կրկնապատկել է մարդասիրական օգնության փաթեթը՝ հասցնելով այն 10,45 միլիոն եվրոյի, ինչպես նաև Հայաստանի խնդրանքով ակտիվացրել է ԵՄ քաղաքացիական պաշտպանության մեխանիզմը»,–նշված է հայտարարության մեջ:

Բացի այդ, Հայաստանին 15 միլիոն եվրոյի աջակցություն կտրամադրվի՝ հասցեագրելու սոցիալ-տնտեսական կարիքները, սննդամթերքի ու վառելիքի ֆինանսավորման հարցերը:

Sputnik Արմենիա