Ավտոմեքենաներ ներկրողները բողոքի ակցիան են իրականացրել նախագահական նստավայրի դիմաց

Ավտոմեքենաների ներկրմամբ և վաճառքով զբաղվող ընկերությունների ներկայացուցիչները այսօր՝ նոյեմբերի 27-ին, հերթական բողոքի ակցիան են իրականացրել նախագահական նստավայրի դիմաց (Բաղրամյան 26):

«American global group» ավտոներկրող ընկերության հիմնադիր Վարդան Օնանյանը լրագրողների հետ զրույցում հայտարարեց, որ իրենք խնդրում են պատկան մարմիններից, որպեսզի հապճեպ ուժի մեջ չմտնի Հարկային նոր օրենքը, որով իրենք պետք է պարտադիր ունենան 20 տոկոս շահույթ և դրանից 18 տոկոս վճարեն շահութահարկ և ԱԱՀ։

«Բոլորս փաստի առաջ ենք կանգնում, նաև այն հազարավոր հաճախորդները, որոնք մեքենա ներմուծող ընկերությունների հետ պայմանագրեր ունեն կնքած և սպասում են իրենց մեքենաններին։

Մեզ պարտադրում են մեր ներկրած ավտոմեքենաներից 20 % եկամուտ ունենալ, որից շահույթ տանք, բայց վստահաբար՝ այս ընկերությունները 20 % եկամուտ գործարքներից չեն ունենում։ Տասնյակ հազարավոր մարդիկ իրենց մեքենաներին են սպասում, սա հակասահմանադրական օրենք է»,- նշեց նա։

Ավտոներկրող ընկերության տնօրենը հայտնեց, որ գրություն են պատրաստել, որը հանձնելու են ՀՀ նախագահի աշխատակազմ՝ խնդրանքով, որ չստորագրի և չվավերացնի օրենքը, որն առաջին ընթերցմամբ ընդունվել էր նոյեմբերի 14-ին:

Ավելի վաղ ավտոներկրողները բողոքի ակցիաներ էին անցկացրել Կառավարության և ՊԵԿ-ի շենքերի դիմաց։

Նշենք, որ դեկտեմբերի 1-ից Հայաստանում ուժի մեջ է մտնում Հարկային օրենսգրքում փոփոխությունների և լրացումների նոր փաթեթը, որը շահութահարկ է սահմանում ավտոմեքենաների ներմուծմամբ զբաղվող ընկերությունների համար: Ըստ նոր օրենքի` նրանք պետք է ունենան 20 % շահույթ և դրանից 18 % վճարեն շահութահարկ և ԱԱՀ։

Այս փոփոխությունները խորհրդարանի կողմից ընդունվել են նոյեմբերի 16-ին:

News.am