Լիբանանի հոգևոր պետ․ Արցախի ժողովրդի հետ ենք, որովհետև արդարության հետ ենք

Արցախի ժողովրդի հետ ենք, որովհետև արդարության հետ ենք: Ինչպես հայտնում են Կիլիկիայի կաթողիկոսարանից, այս մասին Մեծի Տանն Կիլիկիո կաթողիկոս Արամ Ա-ի հետ հանդիպմանն ասել է Լիբանանի հոգևոր պետը:

«Այս առաւօտ՝ Հինգշաբթի, 21 Դեկտեմբեր 2023-ին, աւելի քան մէկ ժամ տևողութեամբ հանդիպում մը տեղի ունեցաւ Ն.Ս.Օ.Տ.Տ. Արամ Ա. Կաթողիկոսին և Լիբանանի շիիթ համայնքի հոգևոր պետ Շէյխ Ալի Ալ-Խաթիպի միջև:

Հանդիպման Վեհափառ Հայրապետի կողքին ներկայ էին Յունաստանի Հայոց Թեմի առաջնորդ Գերշ. Տ. Գեղամ Արք. Խաչերեան, Կաթողիկոսարանի «Կիլիկիա» մատենադարանի պետ Գերշ. Տ. Շահան Արք. Սարգիսեան և Կաթողիկոսարանի Միջին Արևելքի միջ-եկեղեցական և միջ-կրօնական յարաբերութեանց պատասխանատու Հոգշ. Տ. Սարգիս Վրդ. Աբրահամեան: Շէյխ Ալ-Խաթիպի կողքին ներկայ էին Մուֆթի Շէյխ Ապտ Ամիր Շամսըտտին, Շէյխ Մուհամմատ Հիճազի, շիիթ կեդրոնի տեղեկատուական բաժանմունքի պատասխանատու Ուասէֆ Աուատ և շիիթ համայնքի գործադիր վարչութեան անդամ Ապտսալամ Շըքըր:

Ողջունելով շիիթ համայնքի հոգևոր պետին այցելութիւնը Մեծի Տանն Կիլիկիոյ Կաթողիկոսութեան Մայրավանք՝ Վեհափառ Հայրապետը յայտնեց, որ ինչպէս Լիբանանը բաղկացնող բոլոր համայնքներուն, նոյնպէս շիիթ համայնքին հետ Լիբանանի հայ համայնքը սիրալիր յարաբերութիւն ունի, գործակցելով այն բոլոր աշխատանքներու ծիրէն ներս, որոնց նպատակը Լիբանանի ներքին միասնականութեան ամրապնդումն է և երկրին բարգաւաճումը:

Անդրադառնալով նախագահական ընտրութեան՝ Նորին Սրբութիւնը շեշտեց կարելի փութով Լիբանանի Հանրապետութեան նախագահ մը ունենալու հրամայականը, որպէսզի նոր կառավարութեան նշանակումով երկիրը իր բնական ընթացքը գտնէ: Հայրապետը խօսելով Իսրայէլի նախաձեռնած պատերազմին Կազայի դէմ՝ յիշեցուց, որ հայ ժողովուրդը միշտ եղած է պաղեստինեան արդար դատին կողքին, որովհետև արդարութեան ու մարդկային իրաւանց խնդիրը, ինչպէս նաև անկախ հայրենիք ունենալը հայ ժողովուրդին պայքարը եղած է միշտ ու կը մնայ: Այս ծիրէն ներս Նորին Ս. Օծութիւնը յիշեց, որ հայ ժողովուրդը աւելիով պատճառ ունի կեցուածք ճշդելու Իսրայէլի նկատմամբ, որովհետև նոյն Իսրայէլն է, որ Թուրքիոյ կողքին զինամթերք ու ռազմաքաղաքական աջակցութիւն տուաւ ու կը շարունակէ տալ Ազրպէյճանին:

Պէտք չէ մոռնալ, որ իսրայէլեան ու թրքական զէնքերով մեծ թիւով հայ զինուորներ ու քաղաքացիներ նահատակուեցան ու վիրաւորուեցան, ըսաւ Վեհափառ Հայրապետը: Ան իր խօսքին մէջ նաև յայտնեց, թէ իրեն և Լիբանանի հայութեան համար զարմանալի երևոյթ էր, որ երբ Արցախը գրաւուեցաւ, անոր իրաւունքները ոտնակոխուեցան և աւելի քան հարիւր հազար հայեր գաղթական դարձան, Լիբանանի կարգ մը համայնքներ, ներառեալ շիիթ համայնքը, մնացին լուռ, երբ անդին Հայաստանի դրացի ու բարեկամ երկիրը՝ Իրանը, միշտ մնաց Հայաստանի ամբողջականութեան պահպանման և Արցախի ժողովուրդի իրաւունքներուն կողքին:

Շէյխ Ալ-Խաթիպ ուշադրութեամբ հետևելով Վեհափառ Հայրապետին պարզած տեսակէտներուն ու մտահոգութիւններուն՝ ըսաւ, որ հայ համայնքը, իր բոլոր իւրայատկութիւններով, մեզի համար միշտ կը մնայ սիրելի ու յարգելի: Մենք տեղեակ ենք, թէ Ցեղասպանութենէն ետք հայերը ի՛նչ դժուարութիւններէ անցան և եկան Լիբանան՝ իբրև գաղթական և այսօր կազմակերպուած ու կենսունակ համայնք են: Ակնարկելով Արցախի հարցին՝ ան ըսաւ, թէ հակառակ այն իրողութեան, որ Ազրպէյճան շիիթ դաւանանքին կը պատկանի, մենք արդարութեան հետ ենք, ուստի՝ Արցախի ժողովուրդի իրաւունքներուն հետ: Ապա, Շէյխ Ալ-Խաթիպ անդրադարձաւ Իսրայէլի կատարած անարգ արարքներուն պաղեստինցի և յատկապէս Կազայի ժողովուրդին դէմ: Ան ընդգծեց, որ այսօր քանդումն ու մահը Կազայի մէջ դարձած են ամէնօրեայ ներկայութիւն: Իր կարգին, Շէյխ Ալ-Խաթիպ շեշտեց հանրապետութեան նախագահի շուտափոյթ ընտրութիւն կատարելու և երկիրը ընկերային-տնտեսական տագնապէն դուրս բերելու անհրաժեշտութիւնը:

Պաշտօնական փոխադարձ խօսքերէն ետք, երկու հոգևոր պետերը նաև խօսեցան ընդհանրապէս շրջանը յուզող հարցերու մասին և այդ ծիրին մէջ Վեհափառ Հայրապետը պարզեց Մեծի Տանն Կիլիկիոյ Կաթողիկոսութեան դերը Սփիւռքէն ներս և անդրադարձաւ Իրանի հայ համայնքին: Շէյխ Ալ-Խաթիպ, իր կարգին, յիշեց, թէ ուսանած է Իրանի Ղոմ քաղաքին մէջ և ծանօթ է Իրանի հայ համայնքին, միաժամանակ յիշելով, որ միջ-կրօնական երկխօսութեան ընթացքին ան հանդիպած է Վեհափառ Հայրապետին և ծանօթ է անոր ունեցած դերին:

Հանդիպման աւարտին, Շէյխ Ալ-Խաթիպ առաջարկեց, որ Ս. Ծննդեան տօնէն ետք, հոգևոր պետերու հանդիպում մը տեղի ունենայ շիիթ համայնքի կեդրոնէն ներս: Նորին Սրբութիւնը ողջունեց այս նախաձեռնութիւնը:

Երկու հոգևոր պետերու հանդիպումէն ետք, Շէյխ Ալի Ալ-Խաթիպ ներկայ թղթակիցներուն ընդհանուր գիծերով պարզեց հանդիպման ընթացքին քննարկուած նիւթերը: Նոյնը կատարեց յանուն Նորին Ս. Օծութեան Գերշ. Տ. Գեղամ Արք. Խաչերեան»։

AlphaNews.am