Հայտնի է՝ Ստամբուլի որ հատվածում են ապրել «Կրոկուսի» ահաբեկչության մեջ մեղադրվողները
Մերձմոսկովյան «Կրոկուս Սիթի Հոլում» ահաբեկչության մեջ մեղադրվող երկու անձինք Ստամբուլ ուղևորությունների ժամանակ բնակվել են Ֆաթիհ կամ Շիշլի կենտրոնական թաղամասերի հյուրանոցներում, ընդ որում՝ թե ինչով են նրանք զբաղվել մեկնելուց մի քանի օր առաջ, դեռ գաղտնիք է մնում։ Այս մասին գրում են թուրքական լրատվամիջոցները։
«Կրոկուսում» ահաբեկչության մեջ մեղադրվողներից մեկը՝ Ֆարիդուն Շամսիդինը, խոստովանել էր, որ Թուրքիայից Ռուսաստան է եկել մարտի 4-ին։ Նա նաև պատմել էր, որ իրեն գումար են առաջարկել մարդկանց սպանելու համար։
Yetkinreport պորտալը, հղում անելով թուրքական անվտանգության մարմիններում իր աղբյուրներին, պնդում է, որ Շամսիդինը Մոսկվայից Ստամբուլ է ժամանել փետրվարի 20-ին, իսկ հաջորդ օրը բնակություն է հաստատել Ֆաթիհ թաղամասում գտնվող հյուրանոցում: Կասկածյալը հյուրանոցից հեռացել է փետրվարի 27-ին և միայն մարտի 2-ին է մեկնել Մոսկվա։
Երկրորդ կասկածյալը՝ Ռաչաբալիզոդա Սաիդակրամի Մուրոդալին, ըստ պորտալի, Ստամբուլ է ժամանել հունվարի 5-ին և բնակություն է հաստատել նույն հյուրանոցում, սակայն հյուրանոցից հեռացել է փետրվարի 21-ին: Այնուամենայնիվ, մարտի 2-ին նա Շամսիդինի հետ նույն չվերթով Ստամբուլի Միջազգային օդանավակայանից (IST) մեկնել է Մոսկվա։
Պարբերականը նշում է, որ շարունակում է առեղծված մնալ, թե ինչով են զբաղվել երկու կասկածյալները և որտեղ են գտնվել փետրվարի 27-ից մարտի 2-ն ընկած ժամանակահատվածում (Շամսիդինի դեպքում) և փետրվարի 21-ից մարտի 2-ը (Ռաչաբալիզոդայի դեպքում): Պարբերականի աղբյուրները նշել են, որ երկու կասկածյալներն էլ առանց խնդիրների ժամանել են Թուրքիա և մեկնել այնտեղից, քանի որ նրանց վերաբերյալ ոչ մի հարցում չի եղել, ընդ որում՝ Թուրքիայում բնակվելու ժամկետը «բավարար չէ» նրանց արմատականացման համար:
Իր հերթին Artı Gerçek պորտալը հայտնում է, որ Շամսիդինը Թուրքիայից հեռացել է մարտի 4-ին՝ Ստամբուլի Սաբիհի Գյոքչեն (SAW) օդանավակայանով։ Պարբերականի տվյալներով՝ Շամսիդինը փետրվարին ապրել է Շիշլի կենտրոնական շրջանում թաղամասում հյուրանոցում, իսկ հետո տեղափոխվել է քաղաքի արևմտյան ծայրամասում՝ Բաշաքշեհիր թաղամասում գտնվող մի բնակարան:
Sputnik Արմենիա
