ԵԱՀԿ-ն լվացե՞լ է ձեռքերը Լեռնային Ղարաբաղի հարցից. ԵԱՀԿ գործող նախագահը հստակ պատասխան չունի

Երևանում գտնվող ԵԱՀԿ գործող նախագահ, Մալթայի Հանրապետության արտաքին, եվրոպական գործերի և առևտրի նախարար Յան Բորգին վտարված արցախցիները նամակ են հանձնել։

Նամակը, որում արտահայտված են արցախցիների պահանջներն ու ակնկալիքները, հանձնվել է մայիսի 13-ի մամուլի ասուլիսում։ Նման նամակ հանձնվել է ԱԳ նախարար Արարատ Միրզոյանին։

Ուղերձը հանձնած լրագրողը ընդգծել է, որ արցախցիները ցանկանում են վերադառնալ հայրենիք։

«Արդյո՞ք ԵԱՀԿ-ը փակել է աչքերը Արցախի հարցի հանդեպ։ Եթե ոչ, ապա ինչպես են ԵԱՀԿ-ում պատկերացնում վերադարձը»,- հարցրել է լրագրողը։

Ի պատասխան՝ գործող նախագահը նշել է, որ կազմակերպությունն, իհարկե. մարդկանց համար է և նրանց մասին։ Բայց ԵԱՀԿ-ը չի կարող ներգրավվել մի գործընթացի, որին չի մասնակցում, և ԵԱՀԿ-ը հարգում է երկու երկրների դիրքորոշումը։ Այսպիսով, գործող նախագահը ոչ միայն խուսափել է հարցից, այլև «թաղել» է ԵԱՀԿ Մինսկի խումբը։

Հիշեցնենք, որ ՀՀ վարչապետ Նիկոլ Փաշինյանը միանձնյա «ճանաչեց» Լեռնային Ղարաբաղը Ադրբեջանի կազմում։ 9 ամիս Արցախը շրջափակման մեջ պահելով՝ Ադրբեջանը 2023թ. սեպտեմբերի 19-20-ին օկուպացրեց Լեռնային Ղարաբաղը, հարցը «լուծված» համարելով։

News.am