Խանդանյան․ Սիմոնյանը ներկայացնում է ԱԺ քաղաքական մեծամասնության դիրքորոշումը

ՀՀ Ազգային ժողովի նախագահ Ալեն Սիմոնյանը ներկայացնում է Հայաստանի խորհրդարանի առնվազն քաղաքական մեծամասնության դիրքորոշումը, լրագրողներին ասաց ՀՀ ԱԺ արտաքին հարաբերությունների հանձնաժողովի նախագահ Սարգիս Խանդանյանը՝ մեկնաբանելով ՌԴ Դաշնային խորհրդի արտաքին հարաբերությունների հանձնաժողովի նախագահ Գրիգորի Կարասինին ուղղված նամակը։

Ավելի վաղ Իսպանիայում ԵՄ անդամ պետությունների խորհրդարանների նախագահների համաժողովի ժամանակ Ալեն Սիմոնյանը Ռուսաստանին մեղադրել էր Հայաստանի դեմ սպառնալիքների և ապատեղեկատվության արշավ կազմակերպելու մեջ։ Նա նաև հայտարարել էր, որ ՌԴ–ն ներխուժել է Ուկրաինա։

Դրանից հետո ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն լիագումար նիստում հայտարարել էր, որ ՌԴ Դաշնային խորհուրդը հարցում կուղարկի Հայաստանի ԱԺ՝ պարզելու օրենսդիրների դիրքորոշումը Ալեն Սիմոնյանի՝ Ռուսաստանի հասցեին հնչեցրած մեղադրանքների վերաբերյալ։ Նա հույս էր հայտնել, որ հայ խորհրդարանականները գնահատական կտան նման ելույթին։

Խանդանյանը լրագրողներին նշեց, որ իրեն նամակով դիմել է ոչ թե Մատվիենկոն, այլ Կարասինը և հարցրել է` արդյոք Հայաստանի խորհրդարանը և հայ ժողովուրդը համակարծիք են Ալեն Սիմոնյանի դիրքորոշման և հայտարարությունների հետ։

«Ես անտրամաբանական եմ համարել այդ հարցին պատասխանելը։ Բնականաբար, երբ Հայաստանի Ազգային ժողովի նախագահը ներկայացնում է ՀՀ ազգային ժողովը, նա ներկայացնում է նաև բովանդակությունը և ակնհայտ է, որ այդ հարցի պատասխանն է «այո»։ ՀՀ Ազգային ժողովի նախագահն այն, ինչ հնչեցրել է, ներկայացնում է ՀՀ Ազգային ժողովի առնվազն քաղաքական մեծամասնության դիրքորոշումը։ ՌԴ–ին պատասխան նամակում նշել եմ, թե որոնք են այն սկզբունքները, որով մենք առաջնորդվում ենք` ՀՀ շահերի, տարածքային ամբողջականության ու ինքնիշխանության պաշտպանության տեսանկյունից»,- նշել է Խանդանյանը։

Նա իր պատասխան նամակում մտահոգություն է հայտնել ՌԴ Դաշնային Խորհրդի և Պետական Դումայի մի շարք պատգամավորների կողմից հնչեցվող խոսույթի վերաբերյալ, որոնք չեն բխում Հայաստանի և Ռուսաստանի ժողովուրդների շահերից։

Sputnik Արմենիա