Մեծ Բրիտանիան և Ֆրանսիան Թրամփին կներկայացնեն Ուկրաինայում խաղաղապահների տեղակայման ծրագիրը

Լոնդոնն ու Փարիզը ծրագիր են մշակում Ուկրաինայում մինչև 30 հազար եվրոպացի խաղաղապահ տեղակայելու մասին, եթե Մոսկվան և Կիևը համաձայնության գան հրադադարի մասին: Դրա մասին գրում է The Wall Street Journal պարբերականը՝ վկայակոչելով եվրոպացի պաշտոնյաներին։

Առաջարկի հաջողությունն առաջին հերթին կախված է նրանից, թե արդյոք Դոնալդ Թրամփը կհամաձայնի սահմանափակ աջակցություն ցուցաբերել Ուկրաինայում եվրոպական զորքերի պաշտպանության համար:

Նախնական առաջարկն ԱՄՆ նախագահին կներկայացվի առաջիկա մի քանի օրվա ընթացքում, երբ Մեծ Բրիտանիայի վարչապետ Քիր Սթարմերը և Ֆրանսիայի նախագահ Էմանուել Մակրոնը Սպիտակ տանը կբանակցեն Թրամփի հետ, գրում է Wall Street Journal-ը։

Ծրագիրը Ուկրաինայի տարածքում ԱՄՆ-ից սեփական ուժեր տեղակայում չի պահանջում: Միացյալ Նահագները կարող է հակաօդային պաշտպանության համակարգեր տեղակայել հարևան երկրներում, ինչպես նաև Ուկրաինայի սահմաններից դուրս տեղակայված ռազմաօդային ուժերը պատրաստի վիճակում դնել՝ Ռուսաստանից եվրոպական զորքերին սպառնացող վտանգի դեպքում, հայտնում է BBC-ն։ Ըստ պարբերականի աղբյուրների՝ առանց ԱՄՆ նախագահի աջակցության, խաղաղապահներ ուղարկելու եվրոպական ծրագիրը դժվար կլինի իրականացնել։

Ըստ այս ծրագրի՝ բրիտանական և ֆրանսիական զորքերը ռազմածովային ուժերի և օդային ուժերի հետ միասին կկազմեն այսպես կոչված աջակցության ուժերի ողնաշարը։ Նրանց խնդիրն է լինելու ոչ թե տեղակայվել արևելյան ռազմաճակատի երկայնքով, այլ պաշտպանել ենթակառուցվածքները, քաղաքներն ու նավահանգիստները Սև ծովում։

News.am