Աղբից մինչև արբանյակներ. ԲՏ ոլորտի համար աջակցության նոր ծրագիրը կգործի ապրիլի 1-ից

Տեղեկատվական տեխնոլոգիաների ոլորտի աջակցության նոր ծրագիրը Հայաստանում կգործի ապրիլի 1-ից: Այս մասին որոշումն ընդունվեց այսօր կառավարության նիստում։

Բարձր տեխնոլոգիական արդյունաբերության նախարար Մխիթար Հայրապետյանը հիշեցրեց, որ հունվարի 1-ից ուժի մեջ մտած «Բարձր տեխնոլոգիաների ոլորտի պետական աջակցության մասին» օրենքով բարձր տեխնոլոգիական ոլորտի այն ընկերությունները, որոնք արտասահմանից աշխատակիցներ են ընդունում, պետությունից կստանան 60 տոկոս եկամտահարկի փոխհատուցում (միայն այդ աշխատակիցների մասով, – խմբ․): Նույն փոխհատուցումն ընկերությունները կստանան նոր աշխատակիցներ ներգրավելու համար (խոսքը և՛ նրանց է մասին, ովքեր նոր են մտել աշխատաշուկա, և՛ նրանց, ովքեր նախկինում աշխատել են այլ մասնագիտություններով, - խմբ․):

Աջակցության կտրվի նաև ընկերություններին վերապատրաստման ուղարկվող աշխատակիցների մասով՝ նրանք երեք ամսվա ընթացքում կստանան 50 տոկոս եկամտահարկի փոխհատուցում։

Նախարարը հստակեցրեց՝ եթե 2015-24 թվականներին հարկային արտոնությունները (ավելի զգալի, քան հիմա, - խմբ.) տարածվում էին միայն ՏՏ ոլորտի վրա, ապա այժմ, միջազգային փորձը հաշվի առնելով, դրանք կանդրադառնան նաև ինժեներական մի շարք ուղղությունների վրա, այդ թվում՝ էլեկտրոնային բաղադրամասերի, էլետրոնային մեկուսատախտակների, համակարգիչների և ծայրամասային սարքավորումների, կապի սարքավորումների, ճառագայթահարող բուժսարքավորումների, օպտիկական գործիքների արտադրություն և այլն։ Ըստ նախարարի՝ ծրագիրը ներառելու է նաև աջակցություն օդանավերի, տիեզերանավերի և այլ թռչող սարքերի, ինչպես նաև դրանց մասերի արտադրության համար։

Նախարարը շեշտեց՝ այս ծրագրով փորձ է արվել իսկապես կենտրոնում ունենալ բարձր տեխնոլոգիական արդյունաբերության ոլորտը՝ գիտահեն տնտեսության ունենալու նպատակով։

Կա նաև մեկ այլ արտոնություն, որը կտարածվի ամբողջ ընկերության վրա. շրջանառության հարկով աշխատող փոքր ձեռնարկությունները (ներառյալ՝ ստարտափերը․ -խմբ․) սովորական 5 տոկոս շրջհարկի փոխարեն կվճարեն 1 տոկոս։

Նոր ծրագրով աջակցություն կտրամադրվի նոր տեխնոլոգիաներ ներդնող, գիտական հետազոտությունների և փորձարարական նախագծային աշխատանքներում ներգրավված ընկերություններին։ Այդ բաղադրիչը վերաբերում է ցանկացած ճյուղի մշակումներին՝ աղբի վերամշակումից մինչև արբանյակների գործարկում։

Sputnik Արմենիա