ՌԴ-ի և ԱՄՆ-ի նոր շփումները հնարավոր են արդեն հաջորդ շաբաթ

Ռուսաստանի և ԱՄՆ-ի նոր շփումներին կարելի է սպասել արդեն հաջորդ շաբաթ։ Այս մասին ռուսական Առաջին ալիքին տված հարցազրույցում հայտարարել է ՌԴ նախագահի արտասահմանյան երկրների հետ ներդրումային-տնտեսական համագործակցության հարցերով հատուկ ներկայացուցիչ և Ռուսաստանի Ուղիղ ներդրումների հիմնադրամի ղեկավար Կիրիլ Դմիտրիևը։

Նրա խոսքով` փխրուն հույս կա, որ Ռուսաստանի և ԱՄՆ-ի երկխոսությունը վերականգնվել է, սակայն պետք է դիմակայել երկրների միջև ջերմացումը խափանելու փորձերին:

«Այս պահին փխրուն հույս կա, որ երկխոսությունը վերականգնվել է, բայց, անշուշտ, պետք է դիմակայել, այդ թվում` տեղեկատվական հարձակումներին, որոնք տեղի են ունենում զգացվող ջերմացումը խափանելու համար»,-ասել է Դմիտրիևը։

Նա նշել է, որ ներկայումս Սպիտակ տունը վիթխարի ճնշմում է զգում բոլոր կողմերից, այդ թվում` երկրի ներսում:

«Ես կարծում եմ, որ Միացյալ Նահանգների մեր գործընկերները հասկանում են, որ պետք է վերականգնել Ռուսաստանի հետ երկխոսությունը, որ Ռուսաստանը դիմացել է ռազմավարական պարտություն հասցնելու այն փորձին, որը նախկին նախագահ Ջո Բայդենի վարչակազմը փորձում էր հասցնել նրան։ Դիմացել է արժանապատվորեն»,-հավելել է ՌՈւՆՀ ղեկավարը։

Հիշեցնենք, որ ՌԴ և ԱՄՆ ներկայացուցիչների բանակցությունները կայացել են մարտի 24-ին Էր Ռիադում և տևել են ավելի քան 12 ժամ։ Սպիտակ տունը և Կրեմլը հայտարարություն են տարածել Սաուդյան Արաբիայում փորձագիտական խմբերի հանդիպման արդյունքների վերաբերյալ:

Sputnik Արմենիա