Քրեական պատասխանատվություն Հայոց ցեղասպանության ուրացման համար. ընդդիմության նախագիծը

Քրեական պատասխանատվություն Հայոց ցեղասպանության ուրացման համար։ Ազգային ժողովում այսօր «Հայաստան» խմբակցության քարտուղար Արծվիկ Մինասյանը նշեց, որ Հայոց ցեղասպանության 110–րդ տարելիցին ընդառաջ իրենց խմբակցությունը շրջանառության մեջ է դրել Հայոց ցեղասպանության ուրացման դեպքում քրեական պատասխանատվություն նախատեսող օրինագիծ։

«Սա մի օրինագիծ է, որի մի կողմում ազգային հիշողությունն է, արժանապատվությունն ու ինքնությունը, մյուս կողմում` հայ ազգի թշնամիները»,– նշեց նա։

Ըստ պատգամավորի` այս օրինագծի քննարկումների ընթացքում ՀՀ անունից որոշում կայացնող քաղաքական մեծամասնությունը պետք է ընտրության առաջ կանգնի, և Մինասյանը հույս ունի, որ իշխանավորների գերակշիռ մասը կպաշտպանի ազգային արժանապատվությունը։

Նա հիշեցրեց, որ այս օրերին հերթական անգամ ականատեսն են եղել պատմության խեղաթյուրումներին, ուրացումներին, ազգային–ազատագրական պայքարը հերթական անգամ մոնիտիզացնող վարքագծի, լսել են վիրավորանքներ։

«Սուտն ու կեղծիքը, մեր պատմության խեղաթյուրումը, պայքարողին այսօր նսեմացնելը ոչ մի լավ տեղ չեն տանելու»,– զգուշացրեց Մինասյանը։

Պատգամավորը հիշեցրեց, որ իշխանական կարգավիճակից դուրս կյանք կա, որտեղ դուրս ես գալիս մարդկանց մեջ և պատասխան տալիս խոսքերի ու արարքների համար։

Ի պատասխան նրան արձագանքեց ԱԺ նախագահ Ալեն Սիմոնյանն` ասելով. «Շնորհակալություն սեփական փորձով կիսվելու համար»։

Նշենք, որ ՀՀ իշխանությունները, հայ–թուրքական հաշտեցման ֆոնին, լծվել են Հայոց ցեղասպանության ճանաչման գործընթացը ՀՀ արտաքին քաղաքական առաջնահերթություններից հանելու և պահանջատիրությունից հրաժարվելու գործին։

1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։

Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։

Sputnik Արմենիա