«Հայաստան» դաշինքը պատրաստ է քննարկել իմփիչմենթի առաջարկը
Ընդդիմադիր «Հայաստան» խմբակցությունը պատրաստ է քննարկել «Պատիվ ունեմ» խմբակցության պատգամավորների հնչեցրած իմփիչմենթի գործընթաց սկսելու առաջարկը։ Այս մասին ապրիլի 23-ին Ազգային ժողովում ավանդական ճեպազրույցների ժամանակ ասել է ընդդիմադիր «Հայաստան» խմբակցության պատգամավոր, ՀՅԴ անդամ Քրիստինե Վարդանյանը։
«Ես դեռ հնարավորություն չեմ ունեցել լսելու «Պատիվ ունեմ» խմբակցության իմփիչմենթի առաջարկը։ Բայց այս հարցում խնդիրներ չկան։ Մենք առաջինն էինք, որ այս մասին հայտարարեցինք։ Ընդ որում՝ դեռ 2022թ. օգոստոսին, եթե կա առաջարկ, ապա մենք բաց ենք և պատրաստ քննարկման, ինչպես դա եղել է բողոքի շարժման բոլոր փուլերում»,- ասել է պատգամավորը, և սա, ըստ նրա, իշխանափոխության գործիքներից է և բողոքի շարժման փուլերից մեկը։
Նշենք, որ ԱԺ-ում ուժերի հարաբերակցությունը հաշվի առնելով՝ խորհրդարանական երկու ընդդիմադիր ուժերը վարչապետ Նիկոլ Փաշինյանին անվստահություն հայտնելու հնարավորություն չունեն։ Այս առումով տարօրինակ է թվում խնդրի մշտական թարմացումը։
News.am