Տարեվերջին պլանավորվում է Ամուլսարի գործարկումը. Ֆինանսների նախարար

Եթե այս տարի արդեն սկսվի Ամուլսարի գործարկումը, դա կարող է որոշակիորեն, մեր գնահատմամբ, 0.5 տոկոսի շրջանակներում ազդեցություն ունենալ ՀՆԱ-ի աճի վրա: Այս մասին, այսօր՝ մայիսի 2-ին, մամուլի ասուլիսի ժամանակ նշեց ՀՀ ֆինանսների նախարար Վահե Հովհաննիսյանը:

Նա հայտնեց, որ տարեվերջին պլանավորվում է Ամուլսարի գործարկումը, ազդեցությունն ավելի շատ սահմանային է լինելու։

«Բոլորն արդեն դրա մասին խոսում են, և մենք էլ ենք դրա մասին խոսում, որ ՀՀ տնտեսական աճը վերադառնում է իր պոտենցիալ աճին, որը, մեր կարծիքով, կազմում է 5-5,5 տոկոս»,- ասաց նախարարը:

Հիշեցնենք՝ Amnesty International միջազգային իրավապաշտպան կազմակերպությունը իր տարեկան զեկույցի «Առողջ շրջակա միջավայրի իրավունք» բաժնում ահազանգել էր հայաստանցի բնապահպանների նկատմամբ հանքարդյունաբերական ոլորտի ընկերությունների կողմից իրականացվող արշավների մասին։ Մասնավորապես նշված էր. «Ամուլսարի ոսկու հանքին հունվարին թույլատրվել է վերսկսել գործունեությունը՝ առանց լիարժեք լուծելու ջրի և հողի աղտոտման հետ կապված բնապահպանական խնդիրները, որոնք նախորդ տարիներին բողոքի ցույցերի պատճառ էին դարձել։ Բնապահպանները բախվել են դատական հայցերի, որոնք նպատակ ունեին լռեցնել նրանց, ինչպես նաև դարձել են լրատվամիջոցների զրպարտչական արշավների թիրախ։ Այդ արշավներում ներառվել են մեղադրանքներ, թե նրանց ակտիվիզմը սպառնում է ազգային անվտանգությանը։ Այս գրոհներն իրականացվել են 2023 թվականի դեկտեմբերին Ամուլսարի հանքարդյունաբերական ծրագրի բնապահպանական ազդեցությունների վերաբերյալ նրանց համատեղ հայտարարությունից հետո»։

News.am