Երևանի Պուշկինի անվան դպրոցում ստորագրահավաք է. պահանջում են վերադարձնել տնօրենին

Երևանի Պուշկինի անվան դպրոցի ծնողները, աշակերտներն ու ուսուցիչները պահանջում են, որ իրենց դպրոցի տնօրենին աշխատանքից չազատեն։

Նրանք այսօր առավոտյան եկել են դպրոց ու տեսել, որ ո՛չ տնօրեն, ո՛չ պաշտոնակատար չունեն։ Լսել են, որ նրան հեռացրել են աշխատանքից ու ի պաշտպանություն տնօրեն Նատալյա Ստեփանյանի` ստորագրահավաք են սկսել դպրոցում։

«Արդեն 1000–ից ավել ծնող ստորագրել է, մենք պահանջում ենք, որ ԿԳՄՍ նախարարը բացատրի, թե ինչո՞ւ են դպրոցի տնօրենին հեռացրել աշխատանքից։ Ասում են` ատեստացիա չի անցել, բայց մենք ուզում ենք մեզ ցույց տան այդ ատեստացիայի արդյունքները, որովհետեև մեր տնօրենը խելացի է և բանիմաց, մենք չենք հավատում ուղակի ասեկոսեներին»,– լրագրողների հետ զրույցում ասաց ծնողկոմիտեի նախագահ Ալվինա Հովակիմյանը։

Այսօր ժամը 19։00-ին նրանք Տիգրան Ավինյանին և Ժաննա Անդրեասյանին հրավիրել են դպրոց` քննարկման, որպեսզի հասկանան այս քայլի պատճառները։ Իսկ եթե մինչև երկուշաբթի պատասխան չստանան, դպրոցում դասադուլ ու գործադուլ կկազմակերպեն։

Sputnik Արմենիան այս հարցով դիմել է նաև ԿԳՄՍ նախարարություն, սակայն պատասխան դեռ չի ստացել։