Զելենսկի. Պուտինին սպասելու եմ հինգշաբթի օրը Թուրքիայում։ Անձամբ

Ուկրաինայի նախագահ Վլադիմիր Զելենսկին հայտարարել է, որ անձամբ կսպասի Ռուսաստանի նախագահ Վլադիմիր Պուտինին Թուրքիայում հինգշաբթի օրը՝ մայիսի 15-ին, հաղորդում է «РБК-Украина»-ն՝ հղում անելով Ուկրաինայի նախագահի հայտարարությանը։

«Վաղը մենք սպասում ենք հրադադարի՝ լիակատար և տևական, որպեսզի դիվանագիտության համար անհրաժեշտ հիմք ստեղծվի։ Սպանությունները ձգձգելու իմաստ չկա։ Եվ Պուտինին կսպասեմ հինգշաբթի օրը Թուրքիայում։ Անձամբ»,- ընդգծել է նա։

Ուկրաինայի նախագահը հավելել է, որ հույս ունի, որ «այս անգամ ռուսաստանցիները պատճառներ չեն փնտրի, թե ինչու չեն կարող»։

Հիշեցնենք, որ մայիսի լույս 11-ի գիշերը ՌԴ նախագահը հանդես էր եկել մամուլի համար հայտարարությամբ, որի ընթացքում առաջարկել էր Ուկրաինային մայիսի 15-ին Ստամբուլում խաղաղ բանակցություններ սկսել։

Ավելի ուշ Զելենսկին պնդել է, որ նախ պետք է դադարեցվի կրակը, սակայն ԱՄՆ նախագահ Դոնալդ Թրամփը բավական կտրուկ կոչ է արել Ուկրաինային անհապաղ համաձայնել Պուտինի առաջարկին։

News.am