Շիրակի մարզի «Սմավերդի» կոչվող լճում դիակ է հայտնաբերվել

Շիրակի մարզի Լուսաղբյուր գյուղի «Սմավերդի» կոչվող լճում դիակ է հայտնաբերվել։ Տեղեկությունը հայտնում է ՆԳՆ փրկարար ծառայությունը։

Շիրակի մարզային փրկարարական վարչության ճգնաժամային կառավարման կենտրոնը մայիսի 13-ին` ժամը 09։49-ին, ահազանգ է ստացել, որ քաղաքացին ջրի տակ է սուզվել և դուրս չի եկել. անհրաժեշտ է փրկարարների օգնությունը:

Դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ և հատուկ ջրափրկարարական ջոկատի օպերատիվ խումբը՝ ջրասուզակով:

Ջրասուզակը հայտնաբերել է քաղաքացու դին և դուրս բերել ափ։

Տեղի բնակիչներից մեկը` Վահան Թումասյանը, ֆեյսբուքյան էջում գրել է` այս լիճը ձկնորսների սիրելի վայրն է, այս օրերին ափերի ամեն մետրին մի ձկնորս է նստում: Տարածված խոսակցությունների համաձայն` ձկնորսներից մեկն է ջրահեղձ եղել:

Ըստ shamshyan.com–ի` մահացածը Շիրակի մարզի բնակիչ 35-ամյա Անդրանիկ Ս.-ն է։ Նա հոր հետ այցելել է «Սմավերդի լիճ» կոչվող լիճ, ոտքը սայթաքել է, ընկել է լիճը։

Sputnik Արմենիա