ԱՄՆ պետքարտուղարը ևս կմասնակցի Թուրքիայում ռուս-ուկրաինական բանակցություններին

Սաուդյան Արաբիայում իր ելույթի ժամանակ ԱՄՆ նախագահ Դոնալդ Թրամփը հայտարարել է, որ պետքարտուղար Մարկո Ռուբիոն հինգշաբթի կմեկնի Թուրքիա՝ մասնակցելու Ռուսաստանի և Ուկրաինայի միջև բանակցություններին, հաղորդում է NBC News-ը։

Ավելի վաղ ԱՄՆ նախագահը չէր բացառել բանակցություններին իր անձնական ներկայության հնարավորությունը։

Սպիտակ տան բարձրաստիճան պաշտոնյան NBC News-ին հաստատել է, որ Ռուբիոյից բացի, Ստամբուլում անցկացվելիք բանակցություններին ներկա կլինեն նաև ԱՄՆ հատուկ բանագնացներ Սթիվ Ուիթքոֆը և Քիթ Քելլոգը։

Աղբյուրը հայտնել է նաև, որ Թրամփն այս շաբաթ չի մեկնի Թուրքիա։

Ուկրաինայի նախագահ Վլադիմիր Զելենսկին ավելի վաղ հայտարարել էր, որ պատրաստ է մայիսի 15-ին Անկարայում հանդիպել Ռուսաստանի նախագահ Վլադիմիր Պուտինի հետ։

Ավելի վաղ Պուտինը հայտարարել էր, որ իր երկիրը պատրաստ է Թուրքիայում ուկրաինական կողմի հետ ուղիղ բանակցություններ վարելու։

News.am