Զելենսկի․ Պուտինի հետ հանդիպման դեպքում մտադիր եմ քննարկել հրադադարը և գերիների փոխանակումը

Ուկրաինայի նախագահ Վլադիմիր Զելենսկին Liberation-ի հարցազրույցում հայտնել է, որ ՌԴ նախագահ Վլադիմիր Պուտինի հետ հանդիպման դեպքում մտադիր է քննարկել հրադադարը և գերիների փոխանակումը, տեղեկացրել է «РБК-Украина»-ն։

«Եթե հանդիպեմ նրա հետ, մենք պետք է դուրս գանք քաղաքական հաղթանակով՝ հրադադարով, բոլոր գերիների փոխանակմամբ կամ նման մի բանով»,- ասել է Զելենսկին։

Նա նշել է, որ ռուսաստանցիները չեն վստահի ուկրաինացիներին, իսկ ուկրաինացիները չեն վստահի ռուսաստանցիներին։ Ուստի, Ուկրաինայի նախագահի կարծիքով, միայն արտաքին միջնորդները կարող են երաշխավորել բոլոր պայմանավորվածությունների պահպանումը։

Զելենսկին ընդգծել է հուսալի և հավասարակշռված միջնորդության կարևորությունը, որը հարգանք կառաջացներ պատերազմի երկու կողմերի մոտ։ Որպես հնարավոր երաշխավոր նախագահը նշել է ԱՄՆ-ը։

Ուկրաինայի նախագահի կարծիքով՝ Դոնալդ Թրամփի մասնակցությունը կարող է խրախուսել Պուտինին, որ նա գա։

«Եթե Պուտինը չգա, դա նրա համար լիակատար պարտության տեսք կունենա»,- ասել է նա։

Բացի այդ, Զելենսկին կոչ է արել նոր պատժամիջոցներ կիրառել ՌԴ-ի դեմ, մասնավորապես, ԱՄՆ-ի և Եվրամիության կողմից։

Հակամարտության շարունակման վերաբերյալ հարցին Զելենսկին պատասխանել է հետևյալ կերպ. «Ոչ ոք չգիտի, թե որքան կտևի այն։ Բայց ոչ տասը տարի։ Ուկրաինան չի դիմանա... Դա թանկ արժե բոլորի համար, և ոչ միայն բարեկամների, այլև թշնամիների համար»,- ամփոփել է նա։

News.am