Հայաստանն ու Ֆրանսիան «Մտադրությունների մասին» հռչակագիր են ստորագրել
Հայաստանի և Ֆրանսիայի արտաքին գործերի նախարարներ Արարատ Միրզոյանն ու Ժան-Նոել Բարոն ստորագրել են «Մտադրությունների մասին» հռչակագիր։ Համատեղ ասուլիսի ժամանակ այդ մասին հայտնեց ՀՀ ԱԳ նախարար Արարատ Միրզոյանը։
«Այն նախատեսում է ավելի սերտ համագործակցություն երկու գերատեսչությունների միջև, ներառյալ՝ քաղաքական երկխոսության խորացում, պարբերական խորհրդակցությունների անցկացում, արտերկրում գործող դիվանագիտական ներկայացուցչությունների միջև փոխգործակցության ավելացում և այլն»,- ասաց Միրզոյանը։
Նրա խոսքով՝ հանդիպման ընթացքում քննարկվել է երկու երկրների համագործակցությունը տարբեր հարթակներում և ձևաչափերում։
ՀՀ արտաքին քաղաքական գերատեսչության ղեկավարի խոսքով՝ Ֆրանսիայի հետաքրքրությունն ավելանում է մեր երկրում նաև ենթակառուցվածքների զարգացման և կառուցման հարցում։
«Մեր գործընկերությունը տալիս է շատ կոնկրետ արդյունքներ, ինչպես, օրինակ, Վեդիի նորակառույց ջրամբարը»,- նշեց Միրզոյանը՝ հավելելով, որ սա այս համագործակցության միակ արդյունքը չէ։
Հիշեցնենք` Բարոն այսօր է ժամանել Հայաստան։ Այցը պաշտոնական է։ Ասուլիսից առաջ ԱԳՆ-ում կայացել է նրա և ՀՀ արտգործնախարար Արարատ Միրզոյանի առանձնազրույցը:
Sputnik Արմենիա