Վահագն Վերմիշյանի գույքը չի բռնագանձվի․ դատախազությունը հրաժարվել է հայցից

ՀՀ քաղաքաշինության կոմիտեի նախկին նախագահ Վահագն Վերմիշյանի գույքը չի բռնագանձվի։ ՀՀ դատախազությունը հրաժարվել է նրա դեմ ներկայացված «ապօրինի ծագում ունեցող գույքի բռնագանձման» հայցից։ Այս մասին ֆեյսբուքյան իր էջում հայտնում է Վերմիշյանի փաստաբան Ալեքսանդր Կոչուբաևը։

«Սա իրավական առումով լուրջ նախադեպ է և փաստում է, որ պատասխանող կողմը կարողացավ համոզիչ ներկայացնել գործի փաստական և իրավական հիմքերը, որոնք կասկածի տակ դրեցին պահանջի հիմնավորվածությունը»,- գրել է Կոչուբաևը։

Նրա խոսքով՝ այսօր փաստացի հաստատվել է այն, որ ներկայացված հայցը չուներ բավարար ապացուցողական հիմք, և ապօրինի դատավարական հետապնդում էր իրականացվում։

Հիշեցնենք՝ 2023 թվականի հունիսին հայտնի դարձավ, որ դատախազությունը պահանջում է ՀՀ քաղաքաշինության կոմիտեի նախկին նախագահ Վահագն Վերմիշյանից բռնագանձել 4 անշարժ գույք և 46 մլն դրամ։

Ավելի վաղ Վահագն Վերմիշյանին մեղադրանք էր առաջադրվել առանձնապես խոշոր չափի կաշառք ստանալու համար։ Վերմիշյանը դատապարտվել էր 8 տարվա ազատազրկման։

2024 թվականի մարտին՝ ավելի քան 4 տարվա կալանքից հետո Վերմիշյանի խափանման միջոցը փոխարինվեց տնային կալանքով, գրավով և բացակայելու արգելքով:

Sputnik Արմենիա