Ռուսաստանը չի զոհաբերի իր ազգային շահերը. Կրեմլը՝ Թրամփի խոսքերի մասին

Ռուսաստանը չի զոհաբերի իր ազգային շահերը. ՌԴ նախագահի մամուլի քարտուղար Դմիտրի Պեսկովն այսպես է պատասխանել ԱՄՆ նախագահ Դոնալդ Թրամփի՝ ՌԴ-ն և նրա նախագահի գործողությունները քննադատող հայտարարությունները մեկնաբանելու խնդրանքին:

Պեսկովը նշել է, որ Մոսկվան երախտապարտ է Թրամփին միջնորդական ջանքերի համար: Սակայն ընդգծել է, որ առաջիկա բանակցություններում կան բազմաթիվ սկզբունքային հարցեր, որոնց մասով Ռուսաստանը զիջումների չի գնա։

«Հսկայական նրբերանգներ կան այն ամենի շրջանակներում, ինչ պետք է քննարկվի, որոնք կողմերից և ոչ մեկը չի կարող զոհաբերել, եթե ելնում է իր ազգային շահերից։ Ինչպես Միացյալ Նահանգները, այնպես էլ Ռուսաստանն ունի իր ազգային շահերը, որոնք վեր են ամեն ինչից թե՛ մեր, թե՛ մեր նախագահի համար», - ասել է Կրեմլի ներկայացուցիչը։

Հետևաբար, Մոսկվան ջանասիրաբար աշխատում է և պատրաստվում է ուկրաինական կողմի հետ բանակցությունների հաջորդ փուլին՝ միաժամանակ շարունակելով շփումները ամերիկացիների հետ։

Հիշեցնենք` մայիսի 16-ին Ստամբուլում ռուս–ուկրաինական բանակցություններ անցկացվեցին, որոնց ներկա էր նաև թուրքական կողմը։ Շուրջ 2 ժամ տևած հանդիպումից հետո ռուսական պատվիրակության ղեկավար Վլադիմիր Մեդինսկին հայտարարեց, որ իրենք գոհ են բանակցությունների արդյունքից, պայմանավորվել են, որ յուրաքանչյուր կողմը մանրամասն կներկայացնի հրադադարի պայմանների իր տեսլականը, դրանից հետո բանակցությունները կշարունակվեն։Հանդիպման ընթացքում պայմանավորվել են նաև մոտակա օրերին գերիների փոխանակում իրականացնել «1000–ը 1000–ի դիմաց» բանաձևով։

Sputnik Արմենիա