Արաղչի. Իրանը կշարունակի «եվրաեռյակի» հետ բանակցությունները

Թեհրանը մտադիր է շարունակել «եվրաեռյակի» (Մեծ Բրիտանիա, Գերմանիա, Ֆրանսիա) հետ իրանական միջուկային ծրագրի շուրջ բանակցությունները: Այս մասին հայտարարել է Իրանի արտգործնախարար Աբբաս Արաղչին գերմանացի գործընկերոջ` Յոհան Վադեֆուլի հետ հեռախոսազրույցում։

«Արաղչին, մատնանշելով Իրանի և ԱՄՆ–ի միջև դիվանագիտական գործընթացը, հիշատակել է միջուկային հարցում եվրոպական պետությունների արդյունավետ դերը և հայտարարել, որ Իրանը մտադիր է շարունակել երկխոսությունը եվրոպական երեք երկրների և Եվրամիության հետ»,-ասված է նախարարի Telegram-յան ալիքում հրապարակված հաղորդագրությունում։

Նա նաև հույս է հայտնել, որ Գերմանիայի և Իրանի երկկողմ հարաբերությունները կբարելավվեն, և հայտարարել է, որ Թեհրանը պատրաստ է քայլեր ձեռնարկել այդ ուղղությամբ։

Հիշեցնենք` Իրանն ու ԱՄՆ-ն Օմանի միջնորդությամբ բանակցությունների հինգ փուլ են անցկացրել իրանական միջուկային հարցի շուրջ: Վերջինը տեղի է ունեցել մայիսի 23-ին Հռոմում։ Բանակցություններից հետո Աբբաս Արաղչին հայտարարել է, որ Օմանի առաջարկած մեխանիզմները կարող են օգնել վերացնել խոչընդոտները բանակցություններում առաջընթացի հասնելու համար։

Միևնույն ժամանակ հինգերորդ փուլից առաջ սրվել էին կողմերի հակասությունները։ ԱՄՆ-ն բանակցություններից առաջ Իրանից պահանջել էր հրաժարվել ուրանի հարստացումից, իրանական կողմը մերժել էր այդ պահանջը՝ նշելով, որ կողմերը չեն կարողանա պայմանավորվել, եթե ԱՄՆ-ն պնդի, որ Թեհրանը հրաժարվի հարստացման տեխնոլոգիայից:

Sputnik Արմենիա