Իրանի նախագահ. «Մենք անհամբերությամբ սպասում ենք Հայաստան այցին»
Իրանի նախագահ Մասուդ Փեզեշքիանը և Հայաստանի վարչապետ Նիկոլ Փաշինյանը հեռախոսազրույց են ունեցել, որի ընթացքում ընդգծել են Թեհրանի և Երևանի միջև երկկողմ հարաբերությունների խորացման կարևորությունը, հայտնում է Mehr-ը։
Ուրբաթ օրը կայացած հեռախոսազրույցի ընթացքում վարչապետ Փաշինյանը նախագահ Մասուդ Փեզեշքիանին շնորհավորել է Իդ-է-Ղորբան տոնի կապակցությամբ, որը հայտնի է նաև որպես զոհաբերության տոն կամ Իդ ալ-Ադհա։ Երկու քաղաքական գործիչները քննարկել են հայ-իրանական երկկողմ օրակարգին, ինչպես նաև տարածաշրջանային անվտանգությանը վերաբերող հարցեր։
Հայաստանի վարչապետը նշել է իր երկրի և Իրանի Իսլամական Հանրապետության միջև հարաբերությունների շատ լավ մակարդակը՝ ընդգծելով, որ Երևանի պաշտոնյաները անհամբերությամբ սպասում են Փեզեշքիանի այցին Երևան՝ ընդհանուր նպատակների իրականացման և երկու ժողովուրդների շահերի ապահովման շուրջ սերտ հանդիպման, քննարկումների և խորհրդակցությունների համար, գրում է իրանական ԶԼՄ-ն։
Իրանի նախագահն, իր հերթին, բարձր է գնահատել Հայաստանի վարչապետի անկեղծ շնորհավորանքները և, անդրադառնալով երկու ժողովուրդների միջև պատմական, մշակութային և բարեկամական կապերին, ընդգծել է խորը արմատներ ունեցող և կայուն երկկողմ հարաբերությունների կարևորությունը։
Խոսելով Իրանի Իսլամական Հանրապետության արտաքին քաղաքականության մեջ Հայաստանի Հանրապետության հատուկ դիրքի մասին՝ Փեզեշքիանը հայտարարել է. «Կասկած չկա, որ երկու երկրների հարաբերությունները կմնան ամուր և ժամանակի ընթացքում կամրապնդվեն փոխադարձ կամքի պայմաններում։ Մենք անհամբերությամբ սպասում ենք Հայաստան այցին, և այդ այցի անհրաժեշտ պլանավորումը կներառվի օրակարգում»։
News.am