Ճամբարակում զոհերի թիվը հասել է 3-ի. բոլորը կանայք են, տուժածների մեջ երեխաներ չկան

Ճամբարակի Գարեգին Նժդեհի փողոցի շենքերից մեկում տեղի ունեցած պայթյունի հետևանքով զոհերի թիվը հասել է 3–ին. Փրկարարները ևս մեկ դիակ են դուրս հանել փլատակներից։

Փրկարար ծառայության աշխատակցի խոսքով, մահացածներից երեքն էլ կին են, նախնական տեղեկություներով երեխաեր չկան տուժածների մեջ։

«Շենքի բնակիչներից մի քանիսի հետ ներկայումս հնարավոր չէ կապ հաստատել։ Չենք պնդում, որ դա պատահարի հետևանք է, բայց ողջամտորեն այդպիսի ենթադրություն կա»,– ասաց ՓԾ ներկայացուցիչը։

Ավելի վաղ NEWS.am–ը հայտնել էր, որ հունիսի 11-ին՝ ժամը 08։34-ին, Գեղարքունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Ճամբարակ քաղաքի Գարեգին Նժդեհի փողոցի շենքերից մեկի բնակարաններից մեկում հրդեհ է բռնկվել։

Ըստ նախնական տվյալների տեղի է ունեցել գազի պայթյուն՝ փլուզումով շենքի երրորդ հարկի բնակարաններից մեկում․ փլուզվել են 4-րդ, 3-րդ և 2-րդ հարկի բնակարանները։ Մասամբ փլուզվել են կից մուտքի բնակարաններ․ կա 3 զոհ։ Ըստ տեղեկությունների՝ առնվազն ևս 2 հոգի փլատակներում է։ Նրանց փնտրում են։

Ճամբարակի ԲԿ-ից ստացվել է տեղեկատվություն, որ 10 տուժած տեղափոխվել է բժշկական կենտրոն։ Կտրվի լրացուցիչ տեղեկատվություն։