Լրագրող․ Իսրայելի հատուկ ծառայություններն անձամբ ներգրավված են Ալիևի և նրա ընտանիքի պաշտպանության գործում

ներգաղթյալ լրագրող Աֆղան Մուխթարլին JAMnews-ին տված հարցազրույցում հայտարարել է, որ Ադրբեջանի և Իսրայելի միջև գոյություն ունի խոր և բազմակողմանի համագործակցություն։

Ըստ նրա՝ այդ համագործակցությունը ընդգրկում է ոչ միայն ռազմական և տնտեսական ոլորտները, այլև հետախուզությունն ու անվտանգությունը։ Մուխթարլին նշել է, որ չնայած շարունակվող հակամարտությանը, Ադրբեջանը նավթ է արտահանում Իսրայել և մեծ քանակությամբ զենք է գնում նրանից։

«Հայտնի է, որ Իսրայելի հատուկ ծառայություններն են զբաղվում անձամբ Իլհամ Ալիևի և նրա ընտանիքի պաշտպանությամբ։ Հնարավոր է, որ ադրբեջանական հատուկ ծառայությունները գործողություններ են իրականացնում Հարավային Ադրբեջանում (Իրանում Ադրբեջանի արևելյան նահանգի անվանումը – խմբ.)՝ այնտեղ պահելով լրտեսների և գործակալների։ Դա հնարավոր է, քանի որ Իրանի ադրբեջանցիներն ատում են այնտեղի ռեժիմը և, հավանաբար, համագործակցում են Ադրբեջանի հետ։

Բացի դրանից, հաշվի առնելով ադրբեջանա-իսրայելական կապերը, հնարավոր է նաև տեղեկության փոխանցումը Իսրայելին։ Սակայն այդ ամենը դեռևս միայն տեսություն է։ Մենք չունենք որևէ փաստ, որը կհաստատի դա։ Այս տեղեկությունը տարածողը ևս փաստեր չունի։ Ի տարբերություն Հիքմեթ Հաջիևի խոսքերի՝ մենք որևէ հերքող փաստ չունենք։ Թերևս հնարավոր է։ Անձամբ ես այստեղ որևէ արտասովոր բան չեմ տեսնում։

Իրանի և Ադրբեջանի միջև հարաբերությունների վատթարացման ժամանակահատվածներում իրանական Ադրբեջանում հայտնվել են Իլհամ Ալիևի պատկերով պաստառներ, հակաիրանական և ադրբեջանամետ կարգախոսներ։ Դա նույնպես արժե հաշվի առնել։ Այն, ինչ տեղի է ունենում, պատահական իրադարձություն չէ։ Բացի դրանից, տարբեր եվրոպական երկրների ադրբեջանական համայնքները ևս հակաիրանական գործողություններ են իրականացրել։

News.am