Շուտով միասին վերջ ենք տալու պառակտմանը. Սամվել Կարապետյանը հայտարարություն է տարածել
Երկիրը բաժանել են սևերի և սպիտակների։ Այս մասին ասել է գործարար, բարերար Սամվել Կարապետյանը ՔԿՀ–ից հղած իր այսօրվա հայտարարության մեջ։
«Հերոսներին, գեներալներին, գիտնականներին, ամբողջ էլիտային դասեցին սևերի շարքը։ Ոմանց սարքեցին կաշառակերներ, ոմանց սարքեցին հասարակության համար անպիտաններ, բոլոր գործարարները հայտնվեցին սևերի դաշտում, ոմանց դեմ նույնիսկ հարուցվեցին հարյուրավոր անօրինական քրեական գործեր»,– նշել է նա։
Կարապետյանի խոսքով` դաժան ռեպրեսիվ մեքենան դարձել է ամենապահանջված միջոցը և սասանում է մեր երկրի ներքին ամրությունը:
Նա հիշեցրել է, որ երկրի համար սրտացավ, անհանգիստ, աշխատատեղ ու բարիք ստեղծող մարդիկ դարձել են քաղբանտարկյալներ՝ ճաշակելով կալանավայրերի, «խցերի քաղցրությունը»։
Բացի այդ, ըստ նրա` հարգանքի արժանացած տարբեր մարդիկ իրենց ընտանիքների հետ հալածվեցին՝ ստիպված լինելով լքել կամ չվերադառնալ իրենց հայրենիք:
«Շատերին անձամբ եմ ճանաչում, և նման վիճակում հայտնված անձանց անունները կարելի է երկար թվարկել: Հաջողվեց բոլորին հանել բոլորի դեմ։ Քաղաքական ուժերը սկսեցին պայքարել միմյանց դեմ՝ մի կողմ թողնելով գլխավոր չարիքը»,– հայտարարել է Կարապետյանը։
Միաժամանակ, նա չի հուսալքվում ու կարծում է, որ ժամանակը կասի իր խոսքը և անում իր գործը. սևերը սկսեցին սպիտակել, իսկ սպիտակները, որոնք այժմ ժողովրդի մեջ փոքրամասնություն են, կարճ ժամանակ հետո բոլորի համար շոշափելիորեն կմնան ընդամենը մի փոքրիկ խմբակ։
«Չնայած նույնիսկ դա է ինձ ցավ պատճառում, քանի որ բաժանումներից, պառակտումներից սկսվեց մեր ամենադժվար շրջափուլը։ Շուտով միասին վերջ ենք տալու պառակտմանը: Պայքարելու ենք»,– ընդգծել է Կարապետյանը։
Նշենք, որ սա ՔԿՀ–ից հղած նրա 6–րդ հայտարարությունն է։
Sputnik Արմենիա